निर्वाचन प्रक्रियाको विरोधमा रहेका दलहरुलाई निर्वाचनमा सहभागी गराउने प्रयास स्वरुप  राष्ट्रपति रामवरण यादवको आह्वानमा २८ भदौमा बसेको बैठक नेकपा–माओवादीले राखेको प्रस्तावमा आन्तरिक छलफल गरी पुनः बस्ने भन्दै टुंगिएको छ ।

राष्ट्रपति यादव, उपराष्ट्रपति परमानन्द झा र १९ दलका नेताहरु सहभागी बैठकमा नेकपा–माओवादीले मन्त्रिपरिषद अध्यक्ष खिलराज रेग्मीले प्रधानन्यायाधीश पदबाट राजीनामा गर्नुपर्ने, संविधानका अन्तर्वस्तुमा निर्वाचन अगावै सहमति गर्नुपर्ने, गोलमेच सम्मेलन गर्नु पर्ने र निर्वाचन मिति चैतमा सार्नु पर्ने लगायतका प्रस्ताव राखेको छ ।

झण्डै ५ घण्टा चलेको बैठकपछि सञ्चारकर्मीलाई प्रतिक्रिया दिंदै नेकपा–माओवादीका सचिव देव गुरुङले आफ्नो प्रस्तावलाई अरु दलले सकारात्मक लिएको बताए । उनले भने, “उहाँहरुले आन्तरिक छलफलका लागि एक दिनको समय माग गर्नुभएको छ ।”

कांग्रेस सभापति सुशील कोइरालाले छलफल सकारात्मक रहेको भन्दै थपे, “निर्वाचन चैतमा सार्न सकिन्न । वर्तमान सरकारको नेतृत्वमा नै निर्वाचन हुनुपर्छ ।”

एमाले अध्यक्ष झलनाथ खनालले पनि ४ मंसीरका लागि निर्धारित निर्वाचन सार्ने कुरा आफ्नो पार्टीलाई मान्य नहुने बताए । उनले भने, “नेकपा–माओवादीका चारवटा प्रस्तावमध्ये दुईवटा मात्र सकारात्मक छन् । निर्वाचन सार्ने र वर्तमान सरकारको विघटन गरी अर्को सरकार गठन गर्ने विषयमा सहमति हुन सक्दैन ।”

यसअघि उच्चस्तरीय राजनीतिक समतिसँग भएको छलफलमा सहमति नभएपछि माओवादीले गोलमेच सम्मेलन गराउन राष्ट्रपतिसँग आग्रह गरेको थियो ।

प्रतिकृया दिनुहोस