८ कात्तिकमा काभ्रेको धुलिखेलमा आयोजित मध्यमाञ्चल स्तरीय सुरक्षा गोष्ठीको उद्घाटन कार्यक्रममा बोल्दै गृहमन्त्री माधवप्रसाद घिमिरेले निर्वाचन बहिस्कार गर्नेे नेकपा–माओवादीले जनताको अधिकार कुण्ठित पार्न खोजेको र गैरराजनीतिक चरित्र देखाएको आरोप लगाएका छन् ।

उनले भने, “राजनीतिक दल हुन निर्वाचन आयोगमा दर्ता हुन पर्दछ, नेकपा-माओवादीले राजनीतिक व्यवहार समेत देखाउन सकेको छैन । “उनले थपे, “कुनै पनि शक्तिले चुनाव विथोल्ने त के, त्यसक्रममा सिन्का समेत भाच्न सक्दैन ।” निर्वाचन विथोल्न खोज्ने कसैलाई पनि नछाडिने उनले चेतावनी दिए ।

निर्वाचनमा भाग लिने वा नलिने जो सुकै भए पनि गैरराजनीतिक वा लोकतन्त्रविरोधी कृयाकलाप देखाउनेलाई कार्वाही गर्ने गृहमन्त्री घिमिरेले बताए ।

कार्यक्रममा निर्वाचन आयोगका प्रमुख आयुक्त निलकण्ठ उप्रेतीले निर्वाचनको अघिल्लो दिनसम्म भए पनि मतदाताको हातमा परिचयपत्र पुर्‍याउने जानकारी दिए ।

गोष्ठीमा बाग्मती अञ्चलका ८ जिल्ला र जनकपुर अञ्चलका रामेछाप र दोलखा जिल्ला गरी १० जिल्लाका प्रमुख जिल्ला अधिकारी, नेपाली सेना, प्रहरी, शसस्त्र प्रहरी, राष्टिय अनुसन्धान विभागकाका प्रमुखहरुको सहभागिता छ ।
नगेन्द्र अधिकारी, काभ्रे

प्रतिकृया दिनुहोस