चुनावी कार्यक्रम सकेर तनहुँको राम्जाकोट–२ रुपटारमा स्थानीय गोविन्द गिरीको घरमा बास बसेका कांग्रेस नेता रामचन्द्र पौडेलले प्रयोग गरेको सवारी साधनमाथि १३ कात्तिक राति अपरिचित व्यक्तिहरुले पेट्रोल बम प्रहार गरेका छन् ।

राति १ बजे प्रहार गरिएको ४ वटा पेट्रोल बम आक्रमणबाट पार्किङ गरेको बा ६ च ७५५५ नम्बरको जीपको अगाडिका सिसा फुटेका छन् । करिब ४ जनाको संख्यामा आएको समूह बम प्रहार लगत्तै भागेको स्थानीयलाई उद्धृत गर्दै प्रहरीले जनाएको छ ।
घटना लगत्तै प्रहरीले गरेको अनुसन्धानका क्रममा पड्कन थप ४ वटा बम फेला परेको र त्यसलाई नष्ट गरिएको तनहुँका प्रहरी उपरीक्षक गोपीमान श्रेष्ठले बताए ।

बम फालेर समूह भागेका कारण कुनै झडपको स्थिती नभएको र पौडेल सुरक्षित रहेको उनले जानकारी दिएका छन् ।
पौडेल केही दिनदेखि जिल्लाको दक्षिणी भेगमा चुनावी प्रचारमा सक्रिय छन् । उनी आज कोटदरबारको कार्यक्रममा सहभागी भएर दमौली फर्कने कार्यक्रम छ ।

चुनाव बहिष्कारमा सक्रिय नेकपा–माओवादीको प्रभाव बढी रहेको भिरकोटबाट नजिकै पर्ने क्षेत्रमा आक्रमण भएकाले यसमा माओवादीको संलग्नता भएको हुनसक्ने कांग्रेस कार्यकर्ताहरुको आशंका गरेका छन् । तर नेकपा–माओवादीका जिल्ला सेक्रेटरी अतिन्द्रकेशरी न्यौपानेले भने आक्रमणमा आफ्नो पार्टीको संलग्नता अस्वीकार गरे । “हामी शान्तिपूर्ण विरोधमा छौं । हामीबाट आक्रमण भएको हैन ,” उनले भने ।

पवन पौडेल, तनहुँ

प्रतिकृया दिनुहोस