काठमाडौं निर्वाचन क्षेत्र नं.–२ का उम्मेदवार एवम् एमाले वरिष्ठ नेता माधवकुमार नेपालले एमाओवादीले नर्वाचनमा पराजित हुने संभावना देखेपछि निर्वाचन सार्ने षडयन्त्र गर्न लागेको आरोप लगाएका छन् ।

१६ कात्तिकमा काठमाडौंमा पत्रकारहरुसँग कुरा गर्दै नेता नेपालले भने, “हार्छु भन्ने ठानेर कसैले पनि चुनाव सार्ने दाउपेच नगरुन्, हालत खस्किन्छ कि भन्ने ठानेर पनि कसैले यो बाहनाबाजी नगरुन् ।”

४ मंसीरकालागि निर्धारित निर्वाचन कुनै हालतमा पनि नसर्ने भन्दै नेपालले ‘कसैको इच्छा पूरा गर्नका लागि देशलाई थप संकटमा पर्न नदिने’ बताए ।

उनले संविधानसभा निर्वाचनपछि एक वर्षभित्रै संविधान जारी गर्ने दलहरुबीच भएको सहमतिबाट कुनै दल पछि हटे त्यस्ता दललाई जनताबीच ‘नांगेझार’ पार्ने पनि चेतावनी दिएका छन् ।

उनले भने, “एक वर्षभित्र संविधान घोषणा हुन नसके जनमतसंग्रह गरेर भए पनि संविधान जारी गर्ने सहमती भएको छ तर, कुनै दल हारको मानसिकताले चुनावै नगराउने षड्यन्त्रमा लाग्छन् भन्ने अब जनताले नै नांगेझार बनाउनेछन् ।”

उनले निर्वाचन अभियानमा बाधा–अवरोध नगर्न आग्रह गर्दै संविधान निर्माणमा नेकपा–माओवादीको पनि भूमिका आवश्यक हुने बताए ।

एमालेको पक्षमा देशभर जनलहर देखिएपछि केही दल र समूहले निर्वाचन बिथोल्न षड्यन्त्र शुरु गरेको उनको भनाई थियो ।

प्रतिकृया दिनुहोस