कञ्चनपुरका ग्रामीण क्षेत्रका ७५ प्रतिशतभन्दा बढी महिलामा यौनरोगको सङ्क्रमण पाइएको छ । जिल्ला जनस्वास्थ्य कार्यालय कञ्चनपुरले विभिन्न स्वास्थ्य शिविरमा गरेको सर्वेक्षणअनुसार ग्रामीण क्षेत्रका महिलामा यौनरोगको सङ्क्रमण बढ्दो रूपमा देखा परेको हो ।

महिलामा व्यक्तिगत सरसफाइको कमी, असुरक्षित यौनजन्य क्रियाकलाप, यौनअङ्गको सङ्क्रमण, पोषणको कमी लगायतका कारण यौनरोगको समस्या देखापरेको जिल्ला जनस्वास्थ्य कार्यालय कञ्चनपुरका पब्लिक हेल्थ नर्स पशुपति सिंहले जानकारी दिए ।

अधिकांश महिलाको तल्लो पेट दुख्ने, चिलाउने, पिसाब पोल्ने, सेतो पानी बग्ने, यौन अङ्ग वरिपरी फोका देखापर्ने र यौनसम्पर्क राख्न अप्ठेरो हुने लगायतका समस्या देखिएको उनले बताए । उनले भने, “यौनअङ्गको सरसफाइमा ध्यान दिएमा, असुरक्षित यौन सम्पर्क नराखेमा र समयमै स्वास्थ्य चौकी र अस्पतालमा उपचार गराएमा यौन रोग सहजै निको हुन्छ ।”

रासस

प्रतिकृया दिनुहोस