संविधान निर्माणमा सबैको सहमति जुटाउन हदैसम्मको पहल गर्ने भन्दै कांग्रेस सभापति सुशील कोइरालाले सहमति नभए दुईतिहाई बहुमतबाट भए पनि एक वर्षभित्र संविधान जारी गर्ने बताएका छन् ।

१३ मंसीरमा हिमाल खबरपत्रिकालाई अन्तर्वार्ता दिंदै कोइरालाले निर्वाचनमा जाँदा दुईतिहाइ बहुमत दिनुस संविधान बनाउँछौ भन्ने एमाओवादीले अहिले संविधानमै संशोधन गरी सहमतीय आधारमा मात्रै संविधान निर्माण गर्न माग गर्न नहुने बताए । उनले भने, “अहिले आफ्नो अवस्था कमजोर भएपछि संविधान संशोधनको कुरा गर्न मिल्छ ?”

उनले जातीय संघीयता हुने कि नहुने भन्ने बारेमा ४ मंसीरको संविधानसभा निर्वाचन जनमतसंग्रह जस्तै भएको दाबी गर्दै जातीय संघीयताको विरोधमा जनताले अभिमत ब्यक्त गरेको बताए ।

कांग्रेस र एमाले दुवै लोकतान्त्रिक शक्ति भएकाले जनताले अत्यधिक मत दिएर चुनेको बताउने कोइरालाले अहिलेको अवस्थामा दुवै दलले कुनै दम्भ नराखेर जिम्मेवारीसाथ अघि बढ्नु जरुरी भएको बताएका थिए ।

उनले सरकार, संविधान निर्माण, राष्ट्रपतिको निर्वाचन, संविधानका अन्तर्वस्तुका सम्बन्धमा पनि आफ्नो भनाई राखेका थिए । अन्तर्वार्ता साप्ताहिक खबरपत्रिका हिमालको नयाँ अंकमा प्रकाशित छ । साथमा एमाले बरिष्ठ नेता माधवकुमार नेपालसँगको अन्तर्वार्ता पनि ।

प्रतिकृया दिनुहोस