मन्त्रिपरिषद्को २२ मंसीर साँझ बसेको बैठकले दक्षिण अफ्रिकाका पूर्व राष्ट्रपति नेल्सन मण्डेलाको श्रद्धाञ्जली सभामा परराष्ट्र मन्त्री माधव घिमिरेको नेतृत्वमा प्रतिनिधिमण्डल पठाउने निर्णय गरेको छ ।

प्रधानमन्त्री निवास बालुवाटारमा बसेको बैठकले मण्डेलाको निधनमा शोक मनाउन २३ देखि २५ मंसीरसम्म तीन दिन सरकारी कार्यालय र विदेशस्थित कुटनीतिक नियोगमा राष्ट्रिय झन्डा आधा झुकाउने र कुनै पनि सरकारी औपचारिक समारोह नगर्ने निर्णय गरेको सूचना तथा सञ्चार मन्त्री माधव पौडेलले जानकारी दिए ।

बैठकले स्वतन्त्रता, समानता तथा लोकतन्त्रका अथक योद्धा, शान्ति, न्याय र साहसका प्रतीक मण्डेलाको निधनमा शोक व्यक्त गर्दै स्वर्गीय मण्डेलाको दिवङ्गत आत्माको चिर शान्तिको कामना गरेको छ । पूर्व राष्ट्रपति मण्डेलाको २० मंसीर राति उनकै निवास दक्षिण अफ्रिकाको जोहान्नेसबर्गमा निधन भएको थियो ।

प्रतिकृया दिनुहोस