स्थानीय ह्वामा गाविस–७ का ओबिराज पुनकी पाँच वर्षीया छोरी ज्योतिमायाँ पुनलाई काकी नाता पर्ने एक महिलाले खाना पकाउने पनिउँले हान्दा उनको मृत्यु भएको प्रहरीले बताएको छ ।

गोठनजिकै चारपाँचजना समूहमा साथीहरूसँग खेलिरहेकी बालिकालाई कालिनी पुनले हानेपछि स्वास्थ्यचौकी ह्वामा लैजाँदै गर्दा बाटोमा नै उनको मृत्यु भएको हो ।
घटनापछि फरार भएकी ती महिलाको खोजी भइरहेको जिल्ला प्रहरी कार्यालय रोल्पाले जनाएको छ । मृतक बालिकाका बुबा ओबिराज पुनका अनुसार यसअघि ती महिलासँग कुनै पनि रिसइबी थिएन । सदरमुकामबाट चार घण्टाको पैदल दूरीमा पर्ने घटनास्थलतर्फ प्रहरी टोली गएको बताइएको छ ।

यस्तै रोल्पाको लिबाङ–८ गुरुङगाउँमा भीरबाट लडेर बुधबार एक गर्भवती महिलाको ज्यान गएको छ । घाँस काट्न गएको अवस्थामा गुरुङगाउँको निलरह भन्ने भीरबाट लडेर ३६ वर्षीया हुर्मती केसीको ज्यान गएको हो । केसी सिर्जनशील कृषि महिला सहकारीकी सदस्यसमेत थिइन् ।

केसीका श्रीमान् वैदेशिक रोजगारका लागि कतारमा भएको बताइएको छ । परिवारका अनुसार श्रीमान् घरमा नभएकाले दाहसंस्कार गर्न केही समय लाग्ने बताइएको छ ।रासस

प्रतिकृया दिनुहोस