तनहुँको कुइनेटोमा परेको यो ग्रामिण बजार आँबु खैरेनीमा ६ पुसमा भने बेग्लै उमंग आयो । नेपथ्यको संगीतले ६ पुसमा खैरेनी गुञ्जायमान भयो । चर्चित गायक अमृत गुरुङ नेतृत्वको नेपथ्य व्याण्डले पहाडको फेंदमा रहेको चिसो बजारको माहोल न्यानो बनाइदियो र झुमे खैरेनीबासीहरु ‘छेक्यो छेक्यो देउराली डाँडा…’ मा । संयोग पनि कस्तो भने यसै बेला खैरेनीमा डम्म हुस्सु लागेको छ ।

स्थानीय मनकामना चलचित्र मन्दिरको स्टेजमा उत्रिएको नेपथ्यको प्रस्तुतीमा दर्शकहरुले हर्ष, उन्माद र शान्ति एकैपटक महशुस गरे ।

‘नेपालय’ को आयोजनामा ‘शान्तिका लागि शिक्षा’ अभियान अन्तर्गत देशभर नै सांगीतिक प्रस्तुती दिन हिंडेको नेपथ्य ५ पुसमा खैरेनी आइपुगेको हो ।

लोक संगीतलाई रकसँग फ्युजन गरेर ‘लोक रक’ व्याण्डको परिचय पाएको नेपथ्यका प्रस्तुतीले हरेक उमेर समूहलाई मुग्ध पार्न सक्यो ।

नेपथ्यको एभरटाईम हिट ‘जोमसोमै बजारमा १२ बजे हावा सरर…’, ‘सालैजो’, ‘जोगले हुन्छ भेट’, ‘जीवन हो घामछायाँ’ लगायतका चर्चित गीतले वातावरण न्यानो पारेका थिए ।

अझ ‘गाउँ–गाउँबाट उठ वस्ती वस्तीबाट उठ’ र ‘रातो र चन्द्र सूर्य’ गाउँदा वातावरण निकै भावुक र उन्मादपूर्ण बनेको थियो ।

कार्यक्रमको बीचमा गायक गुरुङले सशस्त्र द्वन्द्वको अन्त्य भएपनि राजनीतिक हस्तक्षेपका कारण विद्यालयका विद्यार्थीले पढ्ने र शिक्षकले पढाउने वातावरण धमिलिएको भन्दै विद्यालयमा राजनीति नगरेर शिक्षाको ज्योतिले देशलाई उज्यालो बनाउन आग्रह गरिरहे ।

टिकट बिक्रीबाट संकलित रकम खर्च कटाएर आँबुखैरेनी–५ स्थित अन्नपूर्ण प्रावि ढकालटारका लागि खेलकुद सामाग्री तथा वडा नम्बर ९ को चण्डिका प्राविका लागि खानेपानीको व्यवस्था गरिने सह–आयोजक एन्फा तनहुँ अध्यक्ष रत्नकुमार श्रेष्ठले जानकारी दिए ।
पवन पौडेल, तनहुँ

प्रतिकृया दिनुहोस