आगलागीबाट ध्वस्त झापा सतासीधामस्थित मोनिका भट्टराई बसेको घर । तस्वीर: गोपाल गडतौला ।

झापा सतासीधाम गाविसस्थित एक घरमा १३ पुसा राति आगलागी हुँदा ३२ वर्षीया मोनिका भट्टराई र उनका दुई छोराहरु १३ वर्षीया निकेश र ७ वर्षीया निशानको जलेर मृत्यु भएको छ । मोनिकाका श्रीमान तोम भट्टराई रोजगारीका क्रममा केहिबर्षदेखि बेलायतमा छन् भने मोनिका र दुई छोरासमेत तीन सातापछि बेलायत जाने तयारीमा थिए ।

राति ९ बजेतिर परिवारका तीनैजना सुतिरहेको अवस्थामा घरमा आगो लागेको थियो । छिमेकी घरमा समेत मानिस नभएका कारण चिसो रातमा आगोले घरको अधिकांशभाग जलिसकेपछि मात्रै गाँउमा खबर फैलिएको थियो ।

घरमा बालिएको वत्तिबाट आगलागी भएको हुनसक्ने बताइएको छ । उद्दारको लागि राति १० बजेतिर दमकबाट गएको दमकल दोस्रोपटक पानी भर्न कनकाई नदीमा जाँदा बाटोमै फसेपछि आगो निभाउन झन ढिलो भएको थियो ।

झापाको सुरुंगास्थित होस्टलमा बसेर पढिरहेका निकेश गएको शनिबार मात्रै घर आएका थिए ।

प्रहरीले तिनैवटा शब पोष्टमर्टमका लागि झापा सदरमुकाम चन्द्रगढी पुुर्‍याएको छ ।

मोनिका तिन बर्षदेखि मोरङ दर्बेसास्थित घरबाट झापा सतासीधाममा भिनाजु गणेश बजगाँईको घर पुरै भाडामा लिइ छोराहरु पढाँउदै बसेकी थिइन ।

गोपाल गडतौला, झापा

प्रतिकृया दिनुहोस