काठमाडौं–१० बाट निर्वाचित सभासद् राजन केसीले आम जनताको मन जितेर मात्रै राजनीति गर्नुपर्ने भन्दै हेलिकप्टर चढेर प्रचारमा हिंडेका एमाओवादी अध्यक्ष दाहाललाई पैदल हिंड्ने आफूले हराएको बताएका छन् ।

३० पुसमा पाल्पामा आयोजित कार्यक्रमलाई सम्बोधन गर्दै कांग्रेस सभासद केसीले हेलिकप्टर चढ्नेलाई नभएर जनताको सेवा गर्नेलाई भोट दिन आफूले जनतालाई आह्वान गरेकोले सफल भएको दाबी समेत गरे । उनले एमाओवादीले जातीय राज्य र धेरै संघ बनाउन खोजेकाले पनि उसकै मुद्दाका कारण जनताबाट तिरस्कृत हुनु परेको बताए । केसीले भने, “त्यसमाथि दाहालले नवसामन्तबादको नाईकेको परिचय बनाएका छन् ।”

आफूले टोलटोलका जनतालाई पैदल हिंड्दै भेटेको तर दाहाल हेलिकोप्टरमा उडेर माथिमाथि मात्रै हेरेकाले हार्नु परेको दाबी गरे । उनले भने, “मेरा आफन्तले दाहालसँग चुनाब नलड्न सुझाव दिएका थिए तर, म जनताको सेवक भएकाले हिम्मत गरेरै निर्बाचनमा होमिए र सफल पनि भएँ । ”

केसीले कांग्रेसको नेतृत्वमा सरकार बन्ने र एक वर्षभित्र संविधान दिने भन्दै पार्टीमा गुट उपगुट हुनु मुख्य समस्या भएको बताए । उनले भने, “सिट बाँड्ने, तेरो मेरो भन्ने प्रवृतिको विरोधमा मैले पार्टीमा गम्भीर बहस चलाउनेछु ।”

देब पचभैया, पाल्पा

प्रतिकृया दिनुहोस