५ माघदेखि देशभर अस्पतालको ओपीडी सेवा बन्द गरेर आन्दोलनमा उत्रिएका चिकित्सकहरुले ९ माघ बिहान १० बजदेखि टुँडिखेलमा निःशुल्क उपचार सेवा (ओपीडी) शुरु गरेका हुन् । वीर अस्पताल, शिक्षण अस्पताल, प्रसूति गृह, पाटन, टेकुलगायतका सरकारी तथा केही निजी क्षेत्रका अस्पतालमा कार्यरत करिब ३०० चिकित्सक, परिचारिका (नर्स) तथा प्रयोगशालामा कार्यरत स्वास्थ्य प्राविधिकले बिरामीलाई सेवा दिएका छन् ।

नेपाल चिकित्सक सङ्घको नेतृत्वमा ‘जनतासँग चिकित्सक र डा. केसीसँग जनता’ नाम दिई टुँडिखेलमा चिकित्सकहरुले सामूहिक रुपमा सेवाको शुरुवात गरेका हुन् । अस्पतालमा सेवा नपाई छटपटिएका बिरामीले लाम बसी टुँडिखेलबाट चिकित्सकीय सेवा लिएका छन् ।

उनीहरुले सर्जरी, चर्म तथा यौन रोग, हाडजोर्नी, दन्त, आँखा, बालरोग, मानसिक तथा प्रसूतीलगायतका सेवा दिएका छन् । अनशनरत प्राडा गोविन्द केसीको सबै माग पूरा नभएसम्म टुडिखेलको उपचार सेवा जारी रहने कार्यक्रम संयोजक प्राडा मंगल रावलले बताए ।

त्रिभुवन विश्वविद्यायल कार्यकारी परिषद्को ८ माघमा बसेको बैठकले चिकित्साशास्त्र अध्ययन संस्थानका डीन डा. शशि शर्मालाई पदमुक्त गर्ने निर्णय गरेको भएपनि अनशनमा बसेका प्राडा केसीले आफ्ना माग सम्बोधन नभएको भन्दै अनशन त्यागेका छैनन् । केसीको माग जायज भएको भन्दै समर्थनमा आन्दोलनमा उत्रिएको नेपाल चिकित्सक सङ्घले पनि आन्दोलनका कार्यक्रम फिर्ता लिएको छैन ।

देबकी विष्ट, हिमालखबर

प्रतिकृया दिनुहोस