सरकारले विद्यालयमा कम्प्युटर शिक्षाको पहुँच बढाउन तथा विद्यार्थीको सिकाइमा सहजता ल्याउन माध्यमिक तहको सामुदायिक विद्यालयमा प्रति विद्यालय पाँचवटाका दरले कम्प्युटर दिने भएको शिक्षा विभागले जनाएको छ ।

यसका लागि सरकारले विनियोजन गरेको रु एक अर्ब सम्बन्धित जिल्ला शिक्षा कार्यालयमार्फत प्रतिविद्यालयले रु एक लाख ४० हजारका दरले पाउने गरी विद्यालयलाई पठाइसकेको विभागका महानिर्देशक लव अवस्थीले बताए ।

सरकारले दिएको रकममा विद्यालयले थप रु ६० हजार थपेर पाँचवटा कम्प्युटर खरिद गर्नुपर्नेछ । विद्यालयले थप गर्नुपर्ने रु ६० हजार बैंक खातामा जम्मा गरेको रसिद शिक्षा कार्यालयमा पेस गरेपछि मात्र विद्युत्् खपत कम गर्ने कम्प्युटर खरिद गर्न शिक्षा कार्यालयले विद्यालयलाई उक्त रकम दिनेछ ।

विद्यालयले थप गरेको ६० हजार सहित दुई लाख रुपैयाँमा पाँच थान कम्प्युटर, एक थान प्रिन्टर, इन्टरनेट र विद्युत् लाइन नभएको स्थानमा वैकल्पिक व्यवस्थासमेत गर्नुपर्ने शर्त राखिएको छ ।

विद्युत्् लाइन नपुगेको विद्यालयमा वैकल्पिक ऊर्जामार्फत सहायता उपलब्ध गराएर व्यवस्था गर्ने विभागले जनाएको छ ।

विभागले ०६७ देखि गत वर्षसम्म एक हजार ४५२ विद्यालयमा कम्प्युटरको व्यवस्था गरिसकेको छ भने यसरी वितरण गरेको कम्प्युटर विद्यालयले सही रूपमा प्रयोग गरे नगरेको अनुगमनसमेत गर्ने भएको छ ।
रासस

प्रतिकृया दिनुहोस