२३ माघ राति ५–६ जनाको समूहमा आएका अपहरणकारी समूहले लहानका दुखी महतोलाई घरबाटै अपहरण गरेको दुई दिनपछि एक लाख रुपैयाँ असुल गरेर मुक्त गरेका छन् ।

राष्ट्रिय वाणिज्य बैंक लहान शाखामा महतोको नाममा रहेको खाताबाट चेकमार्फत रु एक लाख झिकेपछि उनीहरुले अपहरण मुक्त गरेका हुन् ।

फिरौती असुलेपछि महतोलाई जिपमा ल्याई २४ माघ राति ११ बजे घर नजिकैको नहरमा छाडेका थिए । त्यसपछि महतोलाई उपचारका लागि अस्पतालमा भर्ना गरेको उनकी श्रीमती चन्द्रिका महतोले बताइन् ।

अपहरणकारीले महतोलाई निर्घात कुटपिट गर्नाका साथै पिठ्युँ र हातमा पत्तीले चिराचिरा पारेर गम्भीर घाइते बनाएका छन् । अपहरण मुक्त भई उपचार गराइरहेका महतोले बैंकको चेकमा जबरजस्ती हस्ताक्षर गराएर रकम निकालिसकेपछि अपहरण मुक्त गरेको बताए ।

उनले अपहरणकारी को हुन, उनीहरुले आफूलाई कहाँ लिएर गएका थिए भन्ने बारेमा थाहा नभएको बताएका छन् ।

अपहरणकारीले घरबाट नागरिकता, जग्गाको लालपुर्जा, बैंकको चेक थैलीलगायतका सबै कागजात समेत लुटेका थिए । उनले भने, “मेरो छोरालाई मारिदिन्छौं भनेका छन् ।”

इलाका प्रहरी कार्यालय लहानका प्रहरी नायब उपरीक्षक ज्ञानेन्द्र फुयाँलले घटनाबारे अनुसन्धान भइरहेको बताए । उनले भने, “अपहरित महतोको आफ्नै काकासँग लामो समयदेखि जग्गा विवाद छ । त्यसैले सो विषय पनि जोडेर अनुसन्धान भइरहेको छ ।”

प्रतिकृया दिनुहोस