झापाको चन्द्रगढीस्थित कलवलगुढीमा २९ माघ राति सम्पन्न बैठकले हालै सम्पन्न संविधानसभाको निर्वाचनमा पार्टीले व्यहोरेको ‘लज्जास्पद पराजय’को समीक्षा गर्दै जिल्ला कमिटीदेखि वडा तहसम्मका नेताहरुको जिम्मेवारी घटुवासहित हेरफेर गरेको छ ।

जिम्मेवारीमा रहेका नेताहरुलाई केहीलाई एक तह र केहीलाई दुई तह घटुवा गरिएको छ । केन्द्रीय सदस्यदेखि जिल्ला इन्चार्ज र वडा सदस्यसम्मका नेता तथा कार्यकर्ताहरुको एक तह घटुवा गरिएको हो ।

केन्द्रीय सदस्य तथा झापा इन्चार्ज धर्मशीला चापागाईंलाई जिल्ला संयोजक बनाइएको छ । केन्द्रीय सदस्य गणेश नेपालीलाई झापा क्षेत्र नं ६ को इन्चार्जको जिम्मेवारी दिइएको छ । त्यस्तै पूर्ववत् जिम्मेवारीमा रहेका सबै नेताको एक तह घटुवा गरिएको विघटित दमक नगर कमिटीका सचिव नवराज सुवेदीले जानकारी दिए ।

राज्य समिति भङ्ग गर्ने निर्णयपछि माओवादीका राज्य समिति तहका नेताहरु अब जिल्ला सदस्य र केही नगर तथा गाउँ सदस्य भएका छन् । जिल्ला सहइन्चार्जको जिम्मेवारी निभाइसकेका ज्योतिसिंह दर्लामी क्षेत्र नं ७ को इन्चार्ज भएका छन् । त्यस्तै झापा–७ का इन्चार्ज रहिसकेका गगन पुरी अब नगर सदस्य भएका छन् ।

अघिल्लो संविधानसभाको निर्वाचनमा पाँच सिट जितेको एनेकपा माओवादी मेची अञ्चलबाट यसपटक शून्यमा झरेको छ ।
रासस

प्रतिकृया दिनुहोस