जाजरकोटको दशेरा –३ तल्लोगाँउमा स्थानीय चँदाराले जंगलमा भेटाएको पाइप  आरनमा पगाल्न खोज्दा विष्फोट भई ६ जना घाइते भएका छन् ।

विष्फोटमा परी गम्भीर घाइते भएकाहरुलाई हेलिकोप्टरबाट उपचारका लागी शिक्षण अस्पताल महाराजजञ्ज काठमाण्डौ लगिएको छ ।

दशेराका जोखे थापाले केही दिनअघि जंगलमा दुबैतर्फ बन्द गरिएको जिआई पाईप भेटाएका थिए । उक्त पाइप पगालेर ओदान बनाउन  थापाले स्थानीय चँदारा (फलामको काम गर्ने) लाई दिएका थिए । उक्त पाइप चँदाराले ८ फागुन विहान आरनमा पगाल्न खोज्दा विष्फोट भएको हो ।

विष्फोटबाट आरन संचालक ५२ बर्षीय कमारो चँदारा, ३५ वर्षीय जोखे थापा, ३५ वर्षीय भक्तबहादुर नेपाली , ३३ वर्र्षीय नरसिंह थापा , ३५ वर्षीय मनबहादुर थापा र १५ बर्षीय नैनबहादुर नेपाली गम्भीर घाईते भएको प्रहरी निरीक्षक घर्मेन्द्र शाहले जानकारी दिए ।

गम्भीर घाईते चँदाराको दाहिने हातको कुहिनोदेखी तलको पुरै भाग चुडिएको छ । भने उनी सहित अन्य सवैको अनुहार , टाउको र छाती बमका छर्राले जलेको छ ।

उक्त पाइपबम सशस्त्र हिंसाका बेला माओवादीले छोडेको हुन सक्ने प्रहरीको अनुमान छ ।

विष्फोट लगत्तै  प्रमुख जिल्ला अधिकारी चक्रपाणी पाण्डे र सभासद राजीव विक्रम शाहको पहलमा नेपाली सेनाको एम आई १७ हेलिकोप्टर उद्धारको लागि आएको थियो ।
राजेन्द्र कार्की, जाजरकोट

प्रतिकृया दिनुहोस