१७ फागुनमा सांकेतिक रूपमा मनाउँदै भोजभतेरमा खर्च नगरी रु.१० लाख जेष्ठ नागरिकहरूको संस्था एजिङ होमलाई दिएपछि बिहारीकृष्ण श्रेष्ठ श्रीमती डा. हिरामन प्रधानका साथमा । तस्बीरः डम्बरकृष्ण श्रेष्ठ/हिमालखबर

तीन वर्षअघि पनि उनले सोसल साइन्स वहाःलाई अक्षय कोष स्थापनाका लागि एकमुष्ट रु.५० लाख दान दिएका थिए । “मेरा दौंतरीहरूले जन्को भोजमा रु.७/८ लाख खर्चेको देखेको छु” १७ फागुनमा ललितपुर, पाटनढोकाको यलमाया केन्द्रमा एजिङ नेपालका निर्देशक कृष्णमुरारी गौतमलाई रु.१० लाखको चेक हस्तान्तरण गरेका बिहारीकृष्ण भन्छन्, “मैले चाहिं जेष्ठ नागरिकहरूको सशक्तीकरण र अधिकारका लागि कोष खडा गर्न खर्चिएँ ।”

पूरै जीवन ग्रामीण विकासको क्षेत्रमा काम गर्दा नेपाली कुनाकन्दराका जेष्ठ नागरिकहरूको दुःख देखेकाले सानो योगदान गर्न मन लागेको उनले बताए । आफूले गरेको सांकेतिक जन्को देखेर अरूमा पनि यस्तै सेवाभाव जागोस् भन्ने उनको चाहना छ । २० माघ २०६७ मा सोसल साइन्स वहाःमा उनले स्थापना गरेको रु.५० लाखको कोषबाट नेपालको जातीय संरचना, भाषा–संस्कृति, परम्परा, विकास आदिका इथ्नोग्राफिक अध्येताहरूलाई फेलोसीप प्रदान गरिंदै आएको छ । उनलाई समाज सेवामा श्रीमती डा. हिरामन प्रधानले सहयोग गर्दै आएकीछिन् ।

बिहारीकृष्णलाई नजिकबाट चिन्नेहरू उनको सेवाभाव, अध्ययन र बौद्धिकताबाट प्रभावित छन् । उनीहरूका अनुसार, नेपालमा समुदायमा आधारित विकेन्द्रीकरण तथा आमा समूह र वन उपभोक्ता समूह स्थापनामा उनले खेलेको भूमिकाको जति प्रशंसा गरे पनि कमै हुन्छ । २१ वर्षअघि उनले आफ्नी छोरी सत्याको बिहेको निम्तोपत्रमै ‘मेरी छोरीलाई कुनै दाइजो उपहार दिनुपर्दैन’ भनेर समाजमा परिवर्तनको बिगुल फुकेका थिए । त्यतिवेला उनले ‘केही दिने मन भए नगद देऊ’ भन्दै जुम्लाको हाडसिंजा–बोतान कृतज्ञता कोषको ब्याङ्क खातामा रकम जम्मा गराएका थिए । यसरी उनले छोरीको बिहेमा हाडसिंजा र बोतानको विकासको लागि दाइजोको रु.१ लाख, आफूले रु.१ लाख र निम्तालुहरुबाट जम्मा भएको रु.१ लाख ११ हजार उपलब्ध गराएका थिए । पछि सो कोषमा जम्मा भएको रु.५ लाखबाट हाडसिंजाका ४६ घरलाई खानेपानी उपलब्ध गराइएको छ भने बोतानमा महिला छात्रावास बनाइएको छ ।

२०१५ सालमा सामाजिक शिक्षा अधिकृतका रूपमा सरकारी जागीर शुरू गरेका बिहारीकृष्णले २०४८ मा अतिरिक्त सचिवबाट अवकाश पाए । आफ्नो कार्यकालमा देश र समाजका लागि अमिट छाप छाड्ने थोरैमध्येका सरकारी कर्मचारीमा पर्छन्, उनी । उनले स्थानीय विकास, राष्ट्रिय योजना आयोग, अर्थ, स्वास्थ्य र आवास मन्त्रालयदेखि तत्कालीन राजदरबारको जाँचबुझ् केन्द्रसम्ममा प्रभावकारी भूमिका खेलेका थिए ।

-डम्बरकृष्ण श्रेष्ठ
बिहारीकृष्णको बारेमा १८ फागुन २०७० को हिमाल खबरपत्रिकामा प्रकाशीत आलेखबाट ।

प्रतिकृया दिनुहोस