पार्टी अध्यक्ष पुष्पकमल दाहाल, उपाध्यक्ष एवम् प्रधानमन्त्री डा बाबुराम भट्टराईसहित पदाधिकारीको बैठकले एक–दुई दिनभित्रै सेना समायोजनको कामलाई अगाडि बढाउने निर्णय गरेको पूर्व जनमुक्ति सेना नेपालका प्रवक्ता चन्द्रप्रकाश खनालले जानकारी दिए ।

यसैगरी बैठकमा स्वैच्छिकअवकाशमा गएका जनमुक्ति सेनालाई कसरी व्यवस्थित गर्ने भन्ने सन्दर्भमा पनि छलफल भएको थियो । प्रवक्ता खनालले भने ‘पार्टीको महाधिवेशन पनि तोकिएको सन्दर्भमा जनमुक्ति सेनाका सदस्यहरुको व्यवस्थापन तथा उनीहरुको जिम्मेवारीका सन्दर्भमा पनि आजको बैठकमा छलफल भएको छ ।’

यसैगरी देशका विभिन्न शिविरहरुमा रहेका तीन हजार १२३ जना समायोजन रोजेका जनमुक्ति सेनालाई तत्काल समायोजनको प्रक्रियामा लैजानका लागि पनि सरकार र पार्टीका तर्फबाट विशेष पहल गर्ने निर्णय गरिएको प्रवक्ता खनालले जानकारी दिए ।

मन्त्रिपरिषद्को ७ भदौमा बसेको बैठकले सेना समायोजन विशेष समितिको म्याद तीन महिना थप गर्ने निर्णय गरेकाले सेना समायोजनको काम अगाडि बढ्ने विश्वास पलाएको प्रवक्ता खनालले जानकारी दिए । रासस

प्रतिकृया दिनुहोस