राजनीतिक दलहरुले चुनावअघि प्रतिबद्धता जनाए अनुसार एक वर्षभित्रै संबिधान जारी गर्न सकिने एमाले वरिष्ठ नेता माधवकुमार नेपालले दाबी गरेका छन् ।

धनुषाको ईनरुवामा आयोजना हुने पार्टी कार्यक्रममा सहभागी हुन ११ चैतमा जनकपुर आएका नेता नेपालले विमानस्थलमा सञ्चारकर्मीहरुसित कुरा गर्दै राज्य पुनर्संरचना र शासकीय स्वरुपको मुद्दालाई पछि निक्र्योल गर्ने गरी एकवर्षभित्र संबिधान जारी गर्न सकिने बताए ।

उनले संघीय राज्यहरुको नामांकन र नापनक्सा गर्न अझै चारवर्ष लाग्ने हुँदा स्थानीय निकायको निर्वाचन जरुरी रहेकोमा जोड दिए । स्थानीय निकाय कर्मचारीको भरमा छोड्दा भ्रष्टाचार बढेको भन्दै अषाढसम्ममा स्थानीय निर्वाचन हुनुपर्ने नेपालको भनाई छ ।

एमालेको आगामी महाधिवेशनबाट नयाँ नेतृत्व चयनका बारेमा सञ्चारकर्मीलाई प्रतिक्रिया दिंदै उनले भने, “म पदको लागि मरिहत्ते गर्दैन, तर पार्टीले जिम्मेबारी दिए नेतृत्व लिन तयार छु ।”

इश्वरचन्द्र झा, जनकपुर

प्रतिकृया दिनुहोस