इरानको राजधानी तेहरानमा हुने असंलग्न आन्दोलनको १६औँ शिखर सम्मेलनमा भाग लिन जाने क्रममा ११ भदौमा त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै उनले नेपालको भूमिका महत्वपूर्ण र प्रभावकारी भएको बताए । भने–“नेपालले यो सम्मेलनमा शान्ति सद्भाव, स्थिरता, विश्व भाइचारा र समान अस्तित्वको विषयमा आफ्नो धारणा राख्छ ।”

शीतयुद्धको अन्त्यपछि असंलग्न आन्दोलनको भूमिका छैन र यसले कुनै पनि अर्थ राख्दैन भन्नेहरूले पनि यसको भूमिका अझ बढेको बताउन थालेको उनले उल्लेख गरे । शिखर सम्मेलनमा नेपालले विश्वमा मनोमानीपूर्ण ढङ्गले बढ्दै गएको आणविक कार्यक्रमका विषयमा पनि कुरा उठाउन सक्ने उनले बताए । भने “नेपाल विश्वमा आणविक कार्यक्रमको होडबाजी होइन, यसलाई निरन्तर घटाउँदै जानुपर्छ भन्ने पक्षमा छ ।” नेपाल संस्थापक सदस्य भएको नाताले पनि यसको भूमिका अझ महत्वपूर्ण रहेको चर्चा गर्दै उनले विश्व अमनचयनमा सम्मेलनले महत्वपूर्ण विषय पारित गर्ने विश्वास व्यक्त गरे ।

सम्मेलनमा क्रममा संयुक्त राष्ट्रसङ्घका महासचिव बान–कि मुन, इरानी राष्ट्रपति मोहम्मद अहमदिनेजाद, इरानका अरू नेतालगायत संसारका अन्य राष्ट्रप्रमुखसँग भेटघाट गर्ने कार्यक्रम रहेको उनले जानकारी दिए । सम्मेलनको परराष्ट्रमन्त्रीस्तरीय बैठकमा भाग लिनका लागि उनी तेहरानतर्फ लागेका हुन् । यसअघि परराष्ट्रसचिव दुर्गाप्रसाद भट्टराई नेतृत्वको प्रतिनिधिमण्डल तेहरान पुगिसकेको छ । प्रधानमन्त्री डा बाबुराम भट्टराईसहितको प्रतिनिधिमण्डल भने यही भदौ १३ गते त्यसतर्फ लाग्ने कार्यक्रम छ । रासस

प्रतिकृया दिनुहोस