सशस्त्र प्रहरी गण पाथिभराले झापाको काकडभिट्टाबाट काठमाडौं आउँदै गरेको बसबाट भारतमा बस्ने चार जना तिब्बती नागरिक, उनीहरुका सहयोगी दुई जना नेपाली साथै बसका चालक र सह–चालकलाई बमसहित पक्राउ गरेको छ ।

ना ५ ख ७८८ नम्बरको बसमा २२ चैत राति चेक जाँच गर्ने क्रममा बसको छतमा लुकाइराखेको डेटोनेटरसहितको बम फेला परेको प्रहरीले जनाएको छ । सशस्त्र प्रहरीले पक्राउ परेका सबैलाई कार्वाहीका लागि इलाका प्रहरी कार्यालय दमकमा बुझाएको जनाएको छ ।

पक्राउ परेका तिब्बतीहरु भारत कर्नाटक राज्यमा विद्यालय सञ्चालन गरी बस्ने ४० वर्षीय लोब्साङ सोन्डेउ, २० वर्षीय सोङ डोए, ३१ वर्षीय लोब्साङ यासी, ४२ वर्षीय लोब्साङ डोस्नोड्यू भएको जनाएको छ ।

त्यसैगरी उनीहरुका सहयोगी नेपाली नागरिक काठमाडौं स्वयम्भूका ३५ वर्षीय महेश अधिकारी र सामाखुशीका २२ वर्षीय महेश खड्का पनि पक्राउ परेका छन् । उनीहरुबारे थप अनुसन्धान भइरहेको प्रहरीले जनाएको छ ।

बरामद गरिएको बमलाई नेपाली सेनाले २३ चैत विहान निष्क्रिय पारेको छ ।

गोपाल गड्तौला, झापा

प्रतिकृया दिनुहोस