उखु उत्पादक किसानसँग भएको सहमति अनुसार उखुको मूल्य भुक्तान गर्न कारखानाले अटेर गरेपछि लुम्बिनी चिनी कारखानाको गोदाम शिल गरिएको नवलपरासी प्रशासन प्रमुख केशबराज घिमिरेले बताएका छन् ।

वीरगञ्जमा किसान र चिनी उद्योगीहरुबीच भएको सहमति अनुसार मुल्य नतोक्दासम्म मिल गेटमा आएको उखु प्रति क्वीन्टल रु ४०० र खेतमा ३७५ का दरमा हालका लागि भुक्तान गर्ने सहमति भएको थियो । उक्त सहमति कार्यान्वयनका लागि आग्रह गर्दा उद्योगले अटेर गरेपछि किसानको दबाब थेग्न नसकी स्थानीय प्रशासनले गोदाममा शिलबन्दी गरेको हो ।

लुम्निबी चिनी कारखानाले किसानलाई उखु खरिदवापतको झण्डै रु २५ करोड भुक्तानी गर्न बाँकी रहेको स्थानीय प्रशासनले जनाएको छ । शुरुमा खरिद गरेको उखुको संझौता मुल्य अनुसार पचास प्रतिशत भुक्तानी दिने र अरु क्रमश दिदै जाने सहमति भएकोमा त्यसको ठाडो उल्लंघन गरेको प्रमुख जिल्ला अधिकारी घिमिरे बताए ।

उद्योगका सञ्चालक मनिष अग्रवाल र महाप्रबन्धक बाबुलाल अग्रवाल सम्पर्कमा नआउने बैठक बोलाउदा समेत वास्ता नगर्ने गर्दा किसानलाई मर्का परिरहेकाले गोदाममा ताला लगाइएको उनले जानकारी दिए ।

गोदाममा शिलबन्दी गरेपछि उद्योगको अभिलेख खाता समेत प्रशासनले नियन्त्रणमा लिएको छ । जिल्लामा रहेका अन्य चारवटा चिनी उद्योगले भने जेनतेन पेश्की भुक्तानी शुरु गरेका छन् । उद्योगले उखुको भुक्तानी नदिए पछि नवलपरासीका किसानहरुले १७ वटा उद्योगले भाडामा लिएका ट्रक एक महिना देखि नियन्त्रणमा लिएका छन् ।

यसवर्ष ३० मंसीरदेखि उखु क्रसिङ्ग शुरु गरेको लुम्बिनी चिनी उद्योगले १६ चैतसम्म ५ लाख ४७ हजार क्वीन्टल उखु क्रसिङ्ग गरेर ४५ हजार ७४० क्वीन्टल चिनी उत्पादन गरेकोमा २५ हजार २ ६४ क्वीन्टल चिनी बिक्री गरिसकेको छ ।
उद्योगमा २० हजार क्वीन्टल चिनी मात्र बाँकी रहेको छ ।
विद्रोही गिरी, नवलपरासी

प्रतिकृया दिनुहोस