दिल्लीका पूर्व मुख्यमन्त्री समेत रहेका आप संयोजक अरविन्द केजरिवाललाई २५ चैतमा दिल्लीको सुल्तानपुरीमा चुनावी कार्यक्रम गरिरहेका बेला अटोरिक्सा चालक लालीले एक थप्पड हानेका थिए । आफूलाई थप्पड हान्नेलाई केजरीवाल फूल लिएर २६ चैतमा भेट्न गएपछि लालीले खुट्टा छोएर माफी मागेको भारतीय सञ्चारमाध्यमले जनाएका छन् ।

केजरीवाल फूल लिएर आफ्नो अगाडि उभिएको देखेपछि लाली भावुक हुँदै माफी मागेका थिए । उनले केजरीवालमाथि वाचा पूरा नगरेको आरोप लगाएका थिए ।

लालीको थप्पडले केजरीवालको बायाँ आँखामा सामान्य चोट लागेको थियो भने उनको चश्मा फुटेको थियो ।

घटनापछि आप समर्थकहरुले लालीलाई पक्रेर पिटेका थिए त्यसपछि उनलाई प्रहरीले हिरासतमा लिएको थियो । तर लालीका विरुद्ध कसैले उजुरी नगरेपछि उनलाई प्रहरीले छोडेको थियो ।

लालीले थप्पड हानेलगत्तै केजरीवाल कार्यक्रम स्थगित गरी महात्मा गान्धीको सभाधिस्थल राजघाट गएर एक घन्टा ध्यान गरेका थिए । त्यसपछि आयोजित पत्रकार सम्मेलनमा उनले आफूमाथि षडयन्त्र भइरहेको भन्दै अझै ठूलो आक्रमण हुनसक्ने बताएका थिए ।

“हामीमाथि अझै ठूला आक्रमण हुनसक्छन तर, हामी बदलामा उत्रिनु हुँदैन, ” उनले भनेका थिए ।

केजरीवालमाथि यसअघि पनि हिसार, बनारस, दिल्ली र गुजरातमा आक्रमण भइसकेको छ । तर पनि उनले राज्यबाट कुनै प्रकारको पनि सुरक्षा लिन अस्वीकार गरेका छन् ।

प्रतिकृया दिनुहोस