माओवादीद्वारा २०६१ सालमा हत्या गरिएका गोरखाका कृष्णप्रसाद अधिकारी हत्या घटनाको अनुसन्धान पूरा गरेर जिल्ला प्रहरी कार्यालय चितवनले अनुसन्धान मिसिल जिल्ला सरकारी वकिल कार्यालयमा बुझाएको छ ।

प्रहरीले २६ चैतमा बुझाएको मिसिलमा हत्या अभियोगमा पक्राउ परेका अभियुक्तहरुलाई १० देखि १५ वर्ष कैद र फरार रहेका अभियुक्तहरुलाई सर्वस्वसहित जन्मकैदको सजाय माग गरिएको छ ।

स्व. कृष्णप्रसाद अधिकारी

“अधिकारी हत्या सम्बन्धमा प्रहरीले अनुसन्धान पूरा गरेको छ, मृतक दुई जनासहित १५ जना दोषि देखिएका छन्,” प्रहरी उपरीक्षक प्रद्युम्न कार्कीले हिमालखबरलाई भने, “अब बल सरकारी वकिलकोे कोर्टमा पुगेको छ ।”उनले अनुसन्धानको काम प्रहरीले पूरा गरेको भन्दै अभियोजनको काम सरकारी वकिलको र छानबिनकोे पाटो अदालतको भएको बताए ।

प्रहरीले घटनास्थल, प्रत्यक्षदर्शी, पीडित र साक्षीको बयान लगायतका आधारमा घटना अनुसन्धान पूरा गरेको कार्कीले बताए ।

चितवन प्रहरीले अधिकारी हत्या सम्बन्धमा सरकारी वकिलको कार्यालयलाई प्रतिवेदन बुझाएको यो तेस्रो पटक हो । यसअघिका दुई प्रतिवेदनमा ‘पर्याप्त आधार नभएको’ भन्दै जिल्ला सरकारी वकिलको कार्यालय चितवनले मुद्दा दायर गरेको थिएन । उसको यस्तो ‘राय’ आएपछि पक्राउ परेका अभियुक्तहरु छुटेका थिए ।

पछिल्लो पटक अधिकारी हत्या अभियोगमा प्रहरीले छविलाल पौडेल र भीमसेन पौडेललाई पक्राउ गरी अनुसन्धान गरेको थियो । उनीहरु दुवै हत्या योजनामा संलग्न रहेको प्रहरीको दाबी छ ।

पक्राउ परेका पौडेलद्वयसहित रामप्रसाद अधिकारी, कालीप्रसाद अधिकारी, रुद्र आचार्य लगायत १५ जना दोषि पाइएको प्रहरी उपरीक्षक कार्कीले बताए ।

दोषिमध्येका ऋषिराम लामिछाने र मदन पौडेलको २०६२ मै सुरक्षाकर्मीसँगको भिडन्तमा मृत्यु भइसकेको प्रहरीको भनाई छ । प्रहरीका अनुसार उनीहरु दुवै गोली हान्ने कार्यमा संलग्न थिए । त्यसैगरी गोली हान्ने अर्का आरोपी रुद्र आचार्य हाल बेलायतमा रहेकाले पक्राउका लागि नेपाल प्रहरीले इन्टरपोलसँग सहयोग मागेको छ । तर, इन्टरपोलले अदालतले जारी गरेको पक्राउ आदेश पठाउन नेपाल प्रहरीलाई आग्रह गरेको प्रहरी स्रोतले जनाएको छ ।

अदालतबाट पक्राउ आदेश जारी हुनासाथ आचार्यलाई इन्टरपोलले पक्राउ गरी नेपाल प्रहरीलाई सुपुर्दगी गर्न सक्नेछ ।

दुई दिनपछि निर्णय हुन्छः सरकारी वकिल
जिल्ला सरकारी वकिलको कार्यालय चितवनका न्यायाधिवक्ता एकनारायण भण्डारीले प्रहरीले बुझाएको मिसिलको पूर्ण अध्ययनपछि मात्रै मुद्दा चलाउने वा नचलाउने भन्ने निर्णय गरिने बताएका छन् ।

२७ चैतमा हिमालखबरसँग कुरा गर्दै न्यायाधिवक्ता पौडेलले भने, “निकै ठूलो फाइल छ, सबै प्रमाण पुगे÷नपुगेको अध्ययन गरेपछि मात्रै निर्णय हुन्छ ।” उनले थप दुई दिन अध्ययनमा मात्रै लाग्ने बताए ।

यसअघिका प्रहरीका दुईवटा प्रतिवेदनमा प्रमाण नपुगेको भन्दै मुद्दा चलाउन नमिल्ने निर्णय गर्नेमा पनि ढकाल नै थिए ।

यता कृष्णप्रसादका आमाबाबु छोराका हत्यारालाई कारवाहीको माग गर्दै लामो समयदेखि वीर अस्पतालमा अनशनरत छन् । उनीहरुको स्वास्थ्य अवस्था अत्यन्तै नाजुक भएको चिकित्सकको भनाई छ ।

सरकारले पटकपटक अनशन तोड्न आग्रह गरे पनि हत्यारामाथि कारवाही प्रक्रिया शुरु नै नभएको भन्दै कृष्णप्रसादका बाबुआमा नन्दप्रसाद र गंगामायाले अनशन तोड्न मानेका छैनन् ।

प्रतिकृया दिनुहोस