चितवन राष्ट्यि निकुञ्जले गैंडा मारेर खाग तस्करी गरेको आरोपमा तिब्बती नागरिकद्वय तान्जिङ लामा, हिसी लामा, नेपाल प्युठानका महेश केसी, नवलपरासीका खुमराज थापालाई कैद सजाय सुनाएको छ । उनीहरू सबै दोस्रोपटक कैद सजाय तोकिएका व्यक्ति हुन् ।

निकुञ्जका प्रवक्ता टीकाराम पौडेलले दिएको जानकारीअनुसार तिब्बती नागरिक काठमाडौँ बौद्ध बस्ने तान्जिङ निमा लामालाई १३ वर्षको कैद र रु एक लाख जरिवाना तोकेको हो ।

निकुञ्जका प्रमुख संरक्षण अधिकृत कमलजङ्ग कुँवरको इजलासले सजाय तोकेको प्रवक्ता पौडेलले जानकारी दिए ।

२०६८ मा चितवनकोे त्रिवेणी क्षेत्रमा गैँडा मारेर खाग बिक्री गरेको आरोपमा पक्राउ परेका उनीसहित तिब्बतकै हिसी लामा, प्युठानका महेश केसी, नवलपरासीका खुमराज थापालाई निकुञ्जले सजाय तोकेको हो ।

हिसी लामालाई १२ वर्षको कैद र रु एक लाख जरिवाना तोकेको , केसीलाई १२ वर्ष कैद र रु एक लाख जरिवाना तथा थापालाई १० वर्ष कैद र रु ८० हजार जरिवाना तोकेको निकुञ्जले जनाएको छ ।

खाग बिक्री गरेको अभियोग प्रमाणित भए रु एक लाख जरिवाना र १५ वर्षसम्म कैद सजाय हुने व्यवस्था छ । संरक्षणकर्मीहरूले अझै कडा कानूनको आवश्यकता भएको बताएका छन् ।
रासस

प्रतिकृया दिनुहोस