बर्दियाको जमुनी गाविस–८ स्थित दशगजामा बरामद भएको बेबारिसे काठ वन कार्यालयमा ल्याउने क्रममा ट्रयाक्टरको ट्रली पल्टिएर एक जनाको मृत्यु भएको हो । सेक्टर वन कार्यालय, मैनापोखरबाट गएको भे १ च २५३० नम्बरको ट्रयाक्टरमा लोड गरेर काठ ल्याउने क्रममा १ जेठ बिहान ट्रयाक्टरको ट्रली पल्टिएको हो ।

काठले किचिएर मैनापोखर गाविस–७ का देवीराम थारुको घटनास्थलमै मृत्यु भएको मैनापोखर इलाका प्रहरी चौकीका हवल्दार रमेश थापाले जानकारी दिए । घटनामा घाइते मैनापोखर–१ का रामदिन थारु र कमल थारुको भने मेडिकल कलेज कोहलपुरमा उपचार भइरहेको छ । उनीहरु दुवैको अवस्था गम्भीर रहेको कोहलपुर इलाका प्रहरी चौकीका डीएसपी माधव श्रेष्ठले जानकारी दिए ।

ट्रयाक्टरको ट्रली पल्टिएको अवस्थामा काठ नै लोड गरिएको अर्को ट्रयाक्टरले उनीहरुलाई किचेको बुझिएको छ । तीनै जना ट्रयाक्टरमा लोड गर्ने मजदुर हुन् ।

दशगजामा बेबारिसे अवस्थामा प्रहरीले बरामद गरेको १५५ क्यूफीट काठ सेक्टर वन कार्यालय, मैनापोखरले ल्याएको हो । सीमा क्षेत्रमा रहेको जंगलबाट ठूलो मात्रामा काठ तस्करी हुँदै आएको छ ।

तुफान न्यौपाने, बर्दिया

प्रतिकृया दिनुहोस