११ जेठ विहान बालुवाटारमा प्रधानमन्त्री सुशील कोइरालाले नेपाली कांग्रेस, एमाओवादी, मधेशी जनअधिकार फोरम लोकतान्त्रिक, सद्भावना पार्टी, राष्ट्रिय मधेश समाजवादी पार्टीलगायतका नेतासँग १२ जेठदेखि हुने भारत भ्रमणका बारेमा परामर्श गरेका हुन् । भेटमा नेताहरुले क्षेत्रीय र द्विपक्षीय सहयोग, शान्ति, स्थायित्व र समृृद्धिका विषयमा केन्द्रित रहेर भारतसँग कुराकानी गर्न प्रधानमन्त्रीलाई सुझाएका थिए ।

छलफलमा सहभागी मधेश समाजवादी पार्टीका अध्यक्ष शरत्सिंह भण्डारीले दुई देशबीचको सम्बन्धलाई बलियो पारी सहयोग बढाउने गरी भारतीय प्रधानमन्त्री नरेन्द्र मोदीसमक्ष प्रस्तुत हुन कोइरालालाई सुझाव दिएको बताए । मोदीको शपथग्रहण समारोहमा नेपालका सम्पूर्ण दलहरुका तर्फबाट शुभकामना दिन पनि प्रधानमन्त्रीलाई आग्रह गरिएको छ ।

अध्यक्ष भण्डारीका अनुसार लामो समयदेखि नेपालमा भारतबाट उच्चस्तरको भ्रमण नभएको हुनाले भारतीय प्रधानमन्त्रीलाई प्रथम विदेश भ्रमण नेपालबाटै शुरु गर्नका लागि निमन्त्रणा गर्न पनि सुझाव दिइयो ।

प्रधानमन्त्री कोइरालाले भारत भ्रमणबारे एक दिनअघि नेकपा एमालेका पदाधिकारी र कूटनीतिक क्षेत्रका विज्ञसँग परामर्श गरेका थिए ।

भारतीय प्रधानमन्त्रीले आफ्नो शपथ ग्रहण समारोहमा प्रधानमन्त्री कोइरालासहित सार्क राष्ट्रका सरकार प्रमुखलाई निमन्त्रणा गरेका छन् ।
रासस

प्रतिकृया दिनुहोस