सशस्त्र हिंसाका बेला माओवादीले थापेको विद्युतीय धरापमा परी २३ जेठ २०६२ मा ३८ सर्वसाधारणले ज्यान गुमाएका थिए भने ७५ जना घाइते भएका थिए । उक्त दिनलाई कालो दिनका रुप सम्झेर घटनामा मृत्यु हुनेहरुको सम्झनामा बाँदरमुढेमा विशेष कार्यक्रमको आयोजना गरिएको छ ।

करिब १५० यात्रु बोकेर माडीको बगईबाट नारायणगढ आउँदै गरेको ना१ख ३२४५ नम्बरको यात्रुबस विस्फोटमा परेको थियो ।

घटना भएको दशक पुग्न लाग्दा पनि घटनाका पीडितहरुले भने उचित राहत पाउन सकेका छैन । घटना पीडित समितिका उपाध्यक्ष लेखनाथ अधिकारीले अझै पनि घाइतेहरुको नियमित उपचार गर्नुपर्ने अवस्था रहेको र धेरैले उचित राहत पाउन नसकेको बताए ।

घटनामा घाईते भएका मध्ये पनि चार जनाको मृत्यु भएको छ । एक जनाले हात्महत्या गरे भने तीन जनाको उपचार नपाएर मृत्यु भएको हो ।

दुर्घटनामा टाउकोमा चोट लागेर मानसिक सन्तुलन गुमाएका गंगाबहादुर गुरुङले घटना भएको दुई वर्ष पछि नदिमा हाम फालेर आत्महत्या गरेका थिए । अर्का घाईते नारायण दत्त पौडेलको उपचार अभावमा तीन वर्ष पछि मृत्यु भएको हो । अर्का घाईते चुनु केसीको चार वर्षमा र नरहरि सापकोटाको डेढ वर्षमा मृत्यु भएको थियो ।

पीडितहरु झन् पीडित बन्दै गएको भन्दै उनले सहयोगका लागि सरकारसँग आग्रह गरेका छन् ।

माओवादीले घटनामा गल्ती भएको स्वीकार गरेको भए पनि राहतका कुनै कार्यक्रम नल्याएको उनले बताए ।

समितिका अध्यक्ष मुक्ति न्यौपाने न्याय त परै जाओस् पीडितले राहतसमेत पाउन नसकेको बताउँछन् ।

आफ्ना अभिभावक गुमाएका बालबालिकाको अवस्था दिन प्रतिदिन जटिल बन्दै गएको र घाइतेहरुको पीडासमेत बल्झिँदै गएको अध्यक्ष न्यौपानेको भनाइ छ । आजको दिनलाई कालो दिनका रुपमा सम्झिइने पीडितहरुले बताएका छन् ।

पीडित र नेपाली सेनाको सहयोगमा मृत्यु भएकाहरुको सम्झनामा यहाँ स्मारक बनाइएको छ ।
सविता श्रेष्ठ, चितवन

प्रतिकृया दिनुहोस