सशस्त्र प्रहरी बल राजस्व एवम् भन्सार गुल्म विराटनगरले हतियारसहित नेपाल प्रवेश गरेका भारत विहारका रञ्जित चौधरी, सञ्जय राय, शान्तिपुर महतो, ३६ वर्षीय विवेक सिंह र आशिष गुप्तालाई पक्राउ गरेको छ ।

रानी सीमा नाकाको दुई नम्बर ढाटमा २४ जेठ साँझ सशस्त्र प्रहरीका हवल्दार राजेश्वर थापा नेतृत्वको टोलीले चेकजाँचका क्रममा पक्राउ गरेको हो ।

निजी माइक्रो भ्यानमा नेपाल प्रवेश गर्दै गरेका उनीहरुमध्येका सञ्जयको साथमा पेस्तोल फेला परेपछि उनीहरुलाई पक्राउ गरिएको प्रहरीले जनाएको छ ।

सञ्जयको साथबाट इटालीमा बनेको सात प्वाइन्ट ६५ एमएमको पेस्तोल एक थान र त्यसमा लाग्ने गोली १० थान बरामद भएको छ ।

प्रहरीले उनीहरुको साथबाट भारतीय रुपैयाँ ५०० को एक लाख र एक हजारको नोट ११ हजारसमेत बरामद गरेको छ ।

उनीहरुसँगै बिआर ११ टी २४६५ नम्बरको माइक्रो भ्यानसमेत प्रहरीले नियन्त्रणमा लिएको छ ।

पक्राउ गरिएका भारतीयहरुले आफूहरु महिन्द्रा डिस्ट्रीब्युटर्स प्रालि विहार पूर्णियाको सञ्चालक रहेको र नेपाल घुम्न आएको बयान दिएका छन् ।

पक्राउ परेकाहरुलाई आवश्यक अनुसन्धानका लागि नेपाल प्रहरीमा बुझाइएको छ ।
रासस

प्रतिकृया दिनुहोस