प्रहरीद्वारा काठमाडौं पुर्‍याइएका रहमानलाई जिल्ला अदालत काठमाडौंले रु पाँच हजार धरौटीमा रिहा गर्न आदेश दिएको छ । सप्तरी प्रहरीविरुद्ध फेसबुकमा ‘सामान्य’ टिप्पणी गरेका रहमानलाई सप्तरी प्रहरीले पक्राउ गरी १९ दिन हिरासतमा राखेर काठमाडौं जिल्ला अदालतमा पेश गरेको थियो ।

रिहा भएपछि सप्तरीका संचारकर्मीहरुसँग फोनमा कुरा गर्दै रहमानले आफू रु ५ हजार धरौटीमा रिहा भएको जानकारी दिए । न्यायाधीश पूर्णप्रसाद शर्माको इजलाशबाट रिहा भएका उनलाई आगामी १७ असारमा तारेख दिइएको छ ।

रहमानलाई प्रहरीले काठमाडौं जिल्ला अदालत लग्दा सरकारी वकीलहरु समेत पुगेका थिएनन् । न्यायाधीश शर्माले आगामी दिनमा यस्तो गल्ती नगर्नु भन्दै धरौटी लिएर तारेखमा रिहा गरेको उनले बताए ।

‘सप्तरीमा सुध्रँदो सुरक्षा’ भन्ने शीर्षकको पत्रिकामा प्रकाशितथ समाचार फेसबुकमा सार्वजनिक हुँदा गत १७ जेठमा रहमानले “के को सुध्रिनु आफ्नै चोरी भएको बाइक फर्काउन पैसा तिर्नु परिरा’ छ । त्यो पनि ५० हजार” भन्ने प्रतिक्रिया लेखेका थिए ।

प्रहरीले प्रतिक्रिया लेख्ने रहमानलाई राजविराज–३ बाट १८ जेठ दिउँसो १ बजे पक्राउ गरेको थियो । जिल्ला प्रहरी कार्यालयले रहमानविरुद्ध १९ जेठमा विद्युतीय कारोबार ऐन विपरीतको अपराध मुद्दा दर्ता गरी सप्तरी जिल्ला अदालतमा २ असारमा पेस गरेको थियो ।

विद्युतीय कारोबार ऐन विपरीतको अपराध मुद्दा हेर्ने क्षेत्राधिकार काठमाडौं जिल्ला अदालतको भएको सप्तरी अदालतको आदेशअनुरुप उनलाई काठमाडौं पठाइएको थियो ।

यसैबीच कमेन्ट लेखेकै भरमा युवा व्यापारी रहमानलाई प्रहरीले २० दिनसम्म नियन्त्रणमा राखेको समाचार बाहिर आएपछि सप्तरीमा प्रहरीको आलोचना भएको छ ।

सर्वसाधारणले सामाजिक सञ्जालमा सप्तरी प्रहरीको उक्त कार्यको विरोध गरिरहेका छन् ।

श्रवणकुमार देव, राजविराज

फेसबुकमा कमेन्ट लेख्ने युवालाई काठमाडौं पुर्‍याइयो

प्रतिकृया दिनुहोस