नेकपा एमालेको नवौं‌ महाधिवेशनमा नयाँ नेतृत्वका लागि भएको निर्वाचनबाट अध्यक्षमा केपी शर्मा ओलीले १०४७ मत प्राप्त गरी विजयी भएका छन् । अध्यक्ष पदका अर्का प्रत्यासी माधवकुमार नेपालले १००३ मत प्राप्त गरे ।

उपाध्यक्षमा वामदेव गौतम, भीम रावल, विद्या भण्डारी, युवराज ज्ञवाली र अष्टलक्ष्मी शाक्य निर्वाचित भएका छन् । रावल, ज्ञवाली र शाक्य नेपाल समूहका हुन् भने गौतम र भण्डारी ओली समूहका हुन् ।

त्यसैगरी महासचिवमा १०३६ मत ल्याएर इश्वर पोखरेल (ओली समूह) निर्वाचित भएका छन् । पोखरेलका प्रतिद्वन्द्वी सुरेन्द्र पाण्डेले १०३० मत प्राप्त गरे ।

उपमहासचिवमा विष्णु पौडेल (ओली समूह) र घनश्याम भुसाल (नेपाल समूह) निर्वाचित भएका छन् ।

सचिवमा प्रदीप ज्ञवाली, गोकर्ण विष्ट, पृथ्वी सुब्बा गुरुङ, योगेश भट्टराई र भीम आचार्य निर्वाचित भएका छन् । विष्ट, भट्टराई र आचार्य नेपाल समूहका हुन् भने ज्ञवाली र गुरुङ ओली समूहका हुन् ।

केपी ओली

२०२२ सालदेखि कम्यूनिष्ट राजनीति शुरु गरेका केपी शर्मा ओलीको जन्म ११ फागुन २००७ मा झापामा भएको हो ।  २०२८ सालको झापा बिद्रोहको नेतृत्व गर्ने नेताहरु मध्ये एक ओलीले १४ बर्ष जेल जीवन बिताएका छन् ।

प्रमाणपत्र तहसम्मको अध्ययन गरेका ओली २०४८ सालको संसदीय चुनावमा झापा–६ बाट पहिलो पटक निर्वाचित भएका थिए ।

२०५१ र २०५६ मा पनि झापा–६ बाटै निर्वाचित भएका उनी २०५१ सालमा एमालेको अल्पमतको सरकारमा गृहमन्त्री भए ।

२०६४ सालमा भएको संविधानसभा निर्वाचनमा झापा–७ बाट  पराजित भए पनि त्यसपछि २०७० मा भएको संविधानसभाको दोस्रो निर्वाचनमा भने ओली विजयी भए ।

२०४९ सालमा नेकपा एमालेको स्थायी कमिटी सदस्य भएका उनी  २०६३ मा उपप्रधान तथा परराष्ट्रमन्त्री बनेका थिए ।
एमालेको बुटवल अधिवेशनमा अध्यक्ष पदमा उम्मेदवार भएका ओली त्यसबेला निवर्तमान अध्यक्ष झलनाथ खनालसँग पराजित भएका थिए ।

हाल उनी एमाले संसदीय दलको नेतासमेत हुन् ।

प्राप्त मत:

प्रतिकृया दिनुहोस