स्वास्थ्य तथा जनसंख्या मन्त्री अधिकारीले सिफारिश समितिले न्याम्समा उपकुलपतिका लागि तोकिएकै समयभित्र नाम सिफारिश गरे पनि प्रधानमन्त्री सुशील कोइरालाले अनुमोदन नगर्दा ढिलाइ भएको आरोप लगाएका छन् ।

रिपोर्टर्स क्लबले १६ साउनमा गरेको कार्यक्रममा उनले भने, “सिफारिश समितिमा म सहकुलपतिको हैसियतले पदेन सदस्य र प्रधानमन्त्रीले तोकेका दुई जना सदस्य सहितको समितिले गरेको सिफारिशलाई अनुमोदन नगर्दा म आश्चर्यमा परेको छु ।”

तर, उनले प्रधानमन्त्रीले समितिको सिफारिश किन अनुमोदन नगरेको हो भन्नेमा आफू अनभिज्ञ रहेको बताए । उनले उपकुलपती नियुक्तीमा ढिलाइ हुँदा अरु पदाधिकारीको नियुक्तीमा पनि ढिलाइ भएको जिकिर गरे ।

“उपकुलपति नियुक्ती भएको दुई दिनभित्रै सबै पदाधिकारीको नियुक्ती हुन्छ,” उनले भने । पदाधिकारी नियुक्ती नहुँदा वीर अस्पतालमा हड्ताल चलिरहेको उनको भनाइ छ ।

उनले वीर अस्पतालमा आन्दोलनकारीको माग पूरा गर्ने पक्षमा रहेको बताए । उनले भने, “मैले तत्काल नै सिटिस्क्यान र एमआरआई खरीद गर्न निर्देशन दिइसकेको छु, अब केही दिनभित्रै समाधान निस्कने छ ।”

प्रतिकृया दिनुहोस