दुई दिने नेपाल भ्रमणबाट २० साउनमा स्वदेश फर्किएका भारतीय प्रधानमन्त्री नरेन्द्र मोदीले नयाँदिल्लीमा जारी गरेको विज्ञप्तिमा भ्रमणले आफ्नो व्यक्तिगत सम्बन्धमा नयाँ आयाम थपेको उल्लेख गरेका छन् ।  उनले नेपाल चाँडै नै स्थिर, समावेशी र समृद्ध राष्ट्र बन्ने विश्वास पनि व्यक्त गरेका छन् ।

नेपालको संविधानसभाका सदस्यहरुसँग साक्षात्कार गर्न पाउँदा आफू सम्मानित भएको र नेपालमा पाएको अद्वितीय माया र सद्भावले आफूलाई घरमै पुगेको जस्तो अनुभूति भएको मोदीले जारी गरेकोे विज्ञप्तिमा उल्लेख छ ।

उनले दुईदिने भ्रमणमा राजनीतिक स्थिरता र आर्थिक समृद्धिका लागि नेपालमा सबैको समान मत रहेकोे आफूले पाएको बताएका छन् ।

नेपाल र भारत मिलेर दुई देशबीचको सम्बन्धको नयाँ जग बसाउनुपर्नेमा जोड दिँदै भारतीय प्रधानमन्त्री मोदीले एक्काइसौं शताब्दीका अवसर र चुनौतीहरुलाई सम्बोधन गर्न दुवै देशबीच सहकार्य हुने विश्वास व्यक्त गरेका छन् ।

“दुई देशको दीर्घकालीन लक्ष्यलाई यथार्थतामा परिणत गर्न र प्रतिबद्धताहरूलाई व्यवहारमा उतार्न मैले कुनै कसर बाँकी राख्ने छैन,” विज्ञप्तिमा उल्लेख छ ।

आगामी सार्क सम्मेलनमा सहभागी हुन नेपाल पुनः फर्कन र काठमाडौँबाहेक नेपालका अन्य स्थानको पनि भ्रमण गर्न आफू आतुर रहेको मोदीले जनाएका छन् ।

उनले विज्ञप्तिमार्फत राष्ट्रपति रामवरण यादव, प्रधानमन्त्री सुशील कोइराला, नेपाल सरकार, राजनीतिक पार्टी, सङ्घसंस्था, सुरक्षाकर्मीलगायत सबैलाई धन्यवाद पनि दिएका छन् ।

प्रतिकृया दिनुहोस