जिल्ला प्रशासन कार्यालय सुर्खेतका अनुसार ३१ साउन दिउँसोसम्म बाढी र पहिरोमा परी मृत्यु भएका २४ जनाको शव भेटिएको छ भने १४८ जना हराइरहेका छन् ।

३१ साउन दिउँसोसम्म भेटिएका २४ शवमध्ये १२ जनाको पहिचान भएको छ । जसमध्ये साहारे गाविसकी शोभा बुढा, साटाखानीकी झगिसरा दमाई (७०), भीमा दमाई (५), लाटिकोइलीका रवि मिस्त्री, उत्तरगंगाकी हिमानी रावल (६), पर्सेनीकी उजेली बुढा, कुवेर शर्मा र पूजा सिंह रहेका छन् ।

त्यस्तै हरिहरपुरकी मनिसरा कामी, तरंगाकी नैनकला कार्की (७०), जानकी कार्की (५) र कल्पना कार्की (७) को पनि शव भेटिएको छ ।

प्रभावित लेकगाउँमा हालसम्म प्रहरी पनि पुग्न सकेको छैन । जिल्लाका विभिन्न २० स्थानमा सेल्टर बनाएर विस्थापितलाई राखिएको छ ।

सहायक प्रमुख जिल्ला अधिकारी जगत बस्नेतका अनुसार सेल्टरमा हालसम्म करीब एक हजार ८०० जनालाई राखिएको छ ।

सदरमुकाम वीरेन्द्रनगर नगरपालिका भन्दा बाहिर खोरियामा एक, पर्सेनीमा एक र डालकाँडा चर्चमा एक सेल्टर राखिएको छ । त्यस्तै हर्रेको भुकम्प मापन केन्द्रको स्टेशनमा पनि स्थानीय विस्थापित बसेका छन् ।

जिल्लाका अधिकांश भागमा स्कुललाई सेल्टर बनाएर विस्थापितलाई राखिएको छ । जिल्लाभरका एक हजार ४०२ परिवार बाढी र पहिरोबाट प्रभावित भएका छन् ।

३१ साउन दिउँसो तीन बजे हेलिकप्टरबाट राहत रामग्री लिएर आफूहरू प्रभावित बस्तीमा हिँडेको सहायक प्रजिअ बस्नेतले जानकारी दिए ।

लेकपराजुल, तरङ्गा, घाटागाउँ, लेक गाउँ लगायतका उद्धारकर्मी पुग्न नसकेका ठाउँमा हेलिकप्टरद्धारा राहत सामग्री पु¥याइँदै छ ।
तुफान न्यौपाने, नेपालगञ्ज

प्रतिकृया दिनुहोस