प्रधानमन्त्री निवास बालुवाटारमा १२ भदौ विहान बाढी–पहिरो पीडितलाई विभिन्न सङ्घसंस्थाबाट प्राप्त सहयोग रकम हस्तान्तरण कार्यक्रममा बोल्दै प्रधानमन्त्री सुशील कोइरालाले बाढी र पहिरोले विनासलीला मच्चाएको भएपनि उद्धार, राहत र पुनःस्थापनामा कुनै कमजोरी हुन नदिइएको दाबी गरेका छन् ।

कोइरालाले पीडितलाई प्रदान गरिने राहत सामग्री र रकम सदुपयोग होस् भन्नेमा आफू चिन्तित रहेको समेत बताए ।
उनले भने,“संयुक्त राष्ट्र सङ्घमा उद्धार, राहत र पुनःस्थापना कामको अनुभव लिनुभएका वाणिज्य तथा आपूर्ति मन्त्रीलाई यसको समन्वय र अनुगमन गर्न खटाएको छु । यसपटक राहत रकम र सामग्रीको सदुपयोग हुनेछ ।”

उक्त अवसरमा सहयोग गर्ने दाताहरुबाट प्रधानमन्त्री कोइरालाको शीघ्र स्वास्थ्यलाभको कामना गरिएपछि प्रत्यूत्तरमा प्रधानमन्त्री कोइरालले भने, “म ठीक छु । संविधान समयमै आउँछ । मुलुकले उज्यालो पाउँछ । नेपालको विकास कसैले रोक्न सक्दैन ।”

भारतद्वारा ४ करोड ७७ लाख सहयोग
कार्यक्रममा भारतीय दूतावासले प्रधानमन्त्री दैवी प्रकोप उद्धार कोषमा रु ४ करोड ७७ लाख ३९ हजार सहयोग प्रदान गरेको छ । नेपालका लागि भारतीय राजदूत रञ्जित रेले प्रधानमन्त्री कोइरालालाई सो रकम बराबरको चेक हस्तान्तरण गरेका थिए ।

राजदूत रेले हालैको बाढी पहिरोबाट पीडितलाई राहत र पुनःस्थापनाका लागि नेपाल सरकारले थालेका काममा सघाउन भारत सरकारका तर्फबाट उक्त रकम प्रदान गरिएको बताए ।

त्यस्तै सिद्धार्थ बैंक, सिभिल बैंक, एपेक्स कलेज र साङ्ग्रिला म्यानेजमेन्ट एण्ड होटल ट्रेनिङ सेन्टरले पनि प्रधानमन्त्री दैवी प्रकोप उद्धार कोषमा आर्थिक सहयोग प्रदान गरेका छन् ।

एपेक्स कलेजका तर्फबाट सञ्चालक समितिका अध्यक्ष एवम् सूचना तथा सञ्चार मन्त्री डा मीनेन्द्र रिजालले प्रधानमन्त्री कोइरालालाई रु १ लाख ११ हजार १११, सिद्धार्थ बैंक लिमिटेडका तर्फबाट अध्यक्ष चिरञ्जीवीलाल अग्रवालले रु १० लाख, सिभिल बैंकका तर्फबाट प्रमुख कार्यकारी अधिकृत किशोर महर्जनले रु ५ लाख ७५ हजार र साङ्ग्रिला म्यानेजमेन्ट एण्ड होटल ट्रेनिङ सेन्टरका निरज श्रेष्ठले रु ३० हजारको चेक हस्तान्तरण गरेका थिए ।

रासस

प्रतिकृया दिनुहोस