१९ भदौमा बसेको मन्त्रिपरिषद बैठकले राष्ट्रिय बिमा संस्थानको प्रशासकमा अश्विनीकुमार ठाकुर, राष्ट्रिय वाणिज्य बैंकको अध्यक्षमा डा. रेवतबहादुर कार्की, शुक्लाफाँटा जग्गा अधिग्रहण तथा मुआब्जा जाँचबुझ आयोगमा पूर्व न्यायाधीश ठाकुरप्रसाद श्रेष्ठलाई नियुक्त गरेको छ ।

त्यसैगरी अधिकार सम्पन्न एकीकृत बाग्मती सभ्यता विकास समितिको अध्यक्षमा किशोर थापा, नेपाल दूरसञ्चार कम्पनी लिमिटेडको प्रबन्ध निर्देशकमा बुद्धिप्रसाद आचार्यलाई नियुक्त गरेको सञ्चारमन्त्री मिनेन्द्र रिजालले जानकारी दिए ।

बैठकले बाढीपहिरोबाट विशेष रुपमा पीडित बाँके, बर्दिया, सुर्खेत र दाङ जिल्लामा वाणिज्य तथा आपूर्ति मन्त्रीलाई स्थलगत रुपमा त्यहाँको अनुगमन गरी प्रतिवेदन तयार गर्न दिइएको जिम्मेवारीअनुरुप मन्त्रिपरिषद् बैठकमा प्रतिवेदन पेस गरिएकोमा उक्त प्रतिवेदनको कार्यान्वयन तत्काल गराउने निर्णय पनि गरेको छ ।

उपप्रधान एवम् गृहमन्त्री वामदेव गौतम, अर्थमन्त्री डा. रामशरण महत, वाणिज्य तथा आपूर्ति मन्त्री सुनिल थापा र मुख्य सचिव लीलामणि पौडेलसमेत बसेर प्रतिवेदनको कार्यान्वयनबारे आजै टुङ्गो लगाइने सञ्चारमन्त्री मीनेन्द्र रिजालले बताए ।

त्यस्तै सरकारले वार्षिक रुपमा प्रदान गर्ने उत्कृष्ट निजामती सेवा पुरस्कार र निजामती पुरस्कार २२ भदौमा नै प्रदान गर्न सक्ने गरी निर्णय गरेको छ ।

प्रतिकृया दिनुहोस