कावासोती मालपोत कार्यालयका कम्प्युटर अपरेटर सन्तोष रेग्मीले जग्गा धनी प्रमाण पत्र (लालपुर्जा) दिनका लागि गैंडाकोट–९ का दिवाकर पौडेलसँग ५०० रुपैयाँ मागेपछि कार्यालयमा सेवाग्राही र लेखापढी ब्यबसायीले हो–हल्ला गर्दा कार्यालय परिसर केही बेर तनावग्रस्त भएको छ ।

जग्गाको सबै काम सकिएपछि लालपूर्जा लिन जाँदा कर्मचारी रेग्मीले लालपूर्जाका लागि हातको इशाराले ५०० रुपैयाँ मागेको मागेको पौडेलले बताए ।

कम्प्युटरबाट लालपुर्जा प्रिन्ट भइसकेपछि पनि घर्रामा राखेर, छैन भन्दै रेग्मीले पौडेलसँग रकम मागेको पौडेलको दाबी छ ।

कार्यालयमा अन्य सेवाग्रहीहरुले पनि रेग्मीले पहिल्यैदेखि केन्द्रसम्म आफ्नो पहुँच भएको भन्दै खुलेआम घुस माग्ने गरेको आरोप लगाएका छन् ।

लेखापढी व्यवसायी संघका अध्यक्ष मणी भुषालले भने, “पैसा नदिएसम्म लालपुर्जा नै नदिनु त अति नै हो, यसपटक बल्ले फेला परे ।”

रेग्मीले सेवाग्राहीको नाम थर ठेगाना गलत प्रिन्ट गरेर समेत दुख दिने गरेको भुषालले बताए ।

सेवाग्राहीको जुलुस कार्यकक्षमा आएपछि रेग्मीलाई सचेत बनाउने काम गरेको मालपोत कार्यालय कावासोतीका निमित्त प्रमुख कृष्णबहादुर बानियाँले बताए ।

“विभाग र माथिल्लो निकायमा कम्प्युटर अपरेटर सन्तोष रेग्मीले गरेको कामको जानकारी गराएको छु,” उनले भने । घुस मागेको खबर फैलिएपछि रेग्मीले आफ्नो फाँट छोडेर हिडेका थिए ।
विद्रोही गिरी, नवलपरासी

प्रतिकृया दिनुहोस