२७ साउनमा रिपोर्टर्स क्लबले आयोजना गरेको साक्षात्कारमा नेपाली कांग्रेसका नेता खुमबहादुर खड्काले एमाओवादी संविधान बन्न नदिने षडयन्त्रमा लागेको आरोप लगाएका छन् ।

खड्काले भने, “राजनीतिक संवाद समितिका सभापति बाबुराम भट्टराईले संविधान बन्न नदिन दवाव आयो भनेका छन्, त्यो दबाब को र कहाँबाट आएको हो स्पष्ट पार्नु पर्छ ।”

उनले एमाओवादी र नेकपा–माओवादीले विभिन्न बहाना झिकेर अन्य दलहरुलाई अलमल्याउँदै संविधान आउन नदिने दाउमा लागेको आरोप लगाए ।

सहमतिको फेरामा लागे ८ माघमा संविधान नआउने भन्दै उनले संविधान निर्माणका लागि विवादित विषयहरुलाई प्रक्रियामा लगेर टुंगोमा पु¥याउनु पर्नेमा जोड दिए ।

संघीयता र धर्म निरपेक्षताको विषयमा भने जनमतसंग्रह गर्नु पर्ने खड्का जिकिर थियो ।

संघीयता र धर्म निरपेक्षताको विरोध
खड्काले धर्म निरपेक्षता सहितको संविधान जारी गरे भोली पल्टै राजधानीको शान्तिबाटीकामा जलाउने चेतावनी समेत दिएका छन् ।

उनले धर्मनिरपेक्षता जनआन्दोलनको म्याण्डेड नभएको भन्दै अब बस्ने नेपाली कांग्रेस केन्द्रीय समितिको बैठकमा नेपाललाई हिन्दू राष्ट्र बनाउनुपर्ने र संघीयता विनाको संविधान जारी गर्नुपर्ने प्रस्ताव पेश गर्ने बताए ।

नेपाललाई धर्म निरपेक्ष राष्ट्र घोषणा गरिए आगामी केही वर्षभिभत्रै मुलुक धार्मिक द्वन्द्वमा फस्ने उनको दाबी थियो ।

खड्काले आफू संघीयताको पक्षपाती नभएको स्पष्ट पार्दै संघीयताले मुलुकको हित नगर्ने समेत दाबी गरेका थिए ।

संघीयतामा जानै पर्ने भए अहिलेको पाँच विकास क्षेत्रलाई पाँच प्रदेश मानेर जानु पर्ने भन्दै खड्काले जातीय आधारको संघीयतामा गए मुलुक विभाजित हुने दावी गरे ।

वर्तमान सरकारले अहिलेसम्म कुनै पनि गतिलो काम गर्न नसकेको आरोप लगाउँदै खड्काले यस्तै गतिमा अघिबढीरहे कांग्रेसको अस्तित्व नै समाप्त हुने बताए ।

“यो सरकारले भारतीय प्रधानमन्त्री नरेन्द्र मोदी र विदेश मन्त्री सुष्मा स्वराजलाई नेपाल ल्याउनु बाहेक कुनै काम गर्न सकेको छैन,” उनले भने ।

प्रतिकृया दिनुहोस