आईसीसी विश्व क्रिकेट लिग डिभिजन ३ अन्तर्गत नेपाल र अमेरिकाबीचको खेल चलिरहँदा वर्षा भएपछि खेल अवरुद्ध भएको छ । अमेरिकाले प्रस्तुत गरेको २२४ रनको लक्ष्य पछ्याउने क्रममा नेपालले २२ ओभर खेल्दै १ विकेटको क्षतिमा ७३ रन जोडेको छ ।

नेपालका सुवास खकुरेल ४९ र ज्ञानेन्द्र मल्ल २२ रन बनाएर खेलिरहेका छन् । नरेश बुढाएर भने रन नै नबनाइ आउट भए ।

वर्षाका कारण आज पनि खेल छोट्याएर खेलाइने संभावना छ । २० ओभरभन्दा बढी नेपालले खेलिसकेकाले खेल रद्द हुने छैन ।

यही अवस्थामा खेल सकिएमा डीएल मेथड अनुसार नेपालले जित्ने संभावना बढी छ ।

————————————————————————————————————————————————

नेपाललाई अमेरिकाद्वारा २२४ रनको लक्ष्य

आईसीसी विश्व क्रिकेट लिग डिभिजन ३ अन्तर्गत अमेरिकाविरुद्ध पुनः भएको खेलमा नेपालले २२४ रनको लक्ष्य पाएको छ ।

 आईसीसी विश्व क्रिकेट लिग डिभिजन ३ अन्तर्गत नेपालले अमेरिकाको सामना गरिरहेको छ । १० कात्तिकको खेल वर्षाका कारण रद्द भएपछि ११ कात्तिकमा पुनः नेपाल र अमेरिका भिडिरहेका हुन् ।

टस जितेर ब्याटिङ रोजेको अमेरिकाले सबै ओभर खेल्दै ९ विकेटको क्षतिमा २२३ रन बनाएको छ ।

नेपालका शक्ति गौचनले ३ विकेट झारे । बसन्त रेग्मी र सागर पुनले समान दुई–दुई विकेट लिए । दुई अमेरिकन ब्याट्सम्यान रनआउट भए ।

हिजोमा खेलमा अमेरिकाले ४७.३ ओभर खेल्दै २०४ रन बनाएको थियो ।

————————————————————————————————————————————————–

नेपाल र अमेरिकाको भिडन्त भोलि

आईसीसी विश्व क्रिकेट लिग डिभिजन ३ अन्तर्गत नेपाल र अमेरिकाबीचको खेल वर्षाका कारण रद्द भएको छ ।

अब ११ कात्तिकमा फेरि नेपाल र अमेरिकाबीच खेल हुनेछ ।

रद्द भएको खेलमा अमेरिकाले २०५ रनको लक्ष्य दिएको थियो । ४७.३ ओभर खेल्दै अमेरिकाले २०४ रन बनाएको थियो ।

तर, नेपालले जवाफी ब्याटिङ गर्न नपाई नै वर्षाले अवरोध गरेपछि खेल ३० ओभरमा छोट्याइयो र नेपालले १६२ रनको नयाँ लक्ष्य पायो ।

लक्ष्य पछ्याउने क्रममा नेपालले ७ ओभरमा ३ विकेट गुमाउँदै २७ रन बनाएको स्थितिमा फेरि पानी परेपछि खेल रद्द भएको हो ।

——————————————————————————————————————————————-

नेपाललाई अमेरिकाद्वारा २०५ रनको लक्ष्य

आईसीसी विश्व क्रिकेट लिग डिभिजन ३ मा नेपालले अमेरिकाविरुद्ध २०५ रनको लक्ष्य पाएको छ ।

आईसीसी विश्व क्रिकेट लिग डिभिजन ३ अन्तर्गत आफ्नो चौंथो खेलमा नेपालले अमेरिकाको सामना गरिरहेको छ । मलेशियामा जारी खेलमा अमेरिकाले ४७.३ ओभर खेल्दै २०४ रन बनायो ।

टस हारेर फिल्डिङको निम्तो पाएको नेपालका लागि सोमपाल कामीले ३ विकेट लिए । शक्ति गौचन, सागर पुन र बसन्त रेग्मीले २–२ विकेट झारे ।

मलेशियामा चलिरहेको प्रतियोगिताको शीर्ष दुई स्थानमा रहने टिम आईसीसी विश्व क्रिकेट लिग डिभिजन २ मा छनौट हुनेछन् । प्रतियोगितामा नेपालसहित युगान्डा, अमेरिका, मलेशिया, सिंगापुर र बर्मुडा सहभागी छन् ।

तीन खेल जितेर युगान्डा शीर्षस्थानमा छ भने दुई खेल जितेको नेपाल दोस्रो स्थानमा छ । प्रतियोगितामा नेपालको नेट रनरेट राम्रो छ ।

तर, डिभिजन २ मा सजिलैसँग छनौट हुन नेपाललाई आजको खेल जित्नैपर्ने दबाब छ ।

प्रतिकृया दिनुहोस