बाबुराम भट्टराई सभापति रहेको वैधानिक राजनीतिक संवाद तथा सहमति समितिको १४ कात्तिकमा सिंहदरबारमा बसेको बैठकमा संविधानका प्रमुख विवादित विषयमा छलफल भए पनि कुनै सहमति हुन सकेन । संविधानसभाले विवादित विषयमा सहमति जुटाउन दिएको समयसीमा पूरा हुन अब एक दिन मात्रै बाँकी छ ।

शीर्ष नेतृत्वमा नै छलफल गर्नुपर्ने भन्दै सभासद्ले माग गरेपछि बैठकमा कुनै पनि विषयमा ठोस छलफल नभएको समितिका सभापति बाबुराम भट्टराईले जानकारी दिए । हालसम्म अनौपचारिक तथा औपचारिक छलफलका बारेमा बैठकमा जानकारी गराइएको तर दलगत अडानका कारण कुनै निष्कर्ष निस्कन नसकेको उनले बताए ।

सहमति हुने सम्भावना नरहेको अवस्थामा कसरी अगाडि बढ्ने भन्ने विषयमा भट्टराईले सभासद्सँग छलफल गरेका थिए ।

संविधानसभाले समितिलाई सहमति जुटाउन चार पटक म्याद थप गरिसकेको छ । पछिल्लो पटक १५ कात्तिकसम्म अन्तिम पटक भन्दै समय थप गरेको थियो ।

बैठकपछि सभासद् लक्ष्मणलाल कर्णले भने सहमति भए सहज हुने र सहमति नभएको खण्डमा के गर्ने भन्ने विषमया समान धारणा नआएको जानकारी दिए ।

‘‘कार्यतालिकाअनुसार सहमति नभएका विषयलाई प्रश्नावली बनाउनुपर्ने हो, सहमति पनि भएको छैन, समय पनि छैन यस्तो अवस्थामा शनिबारको बैठकमा ठोस निर्णय गरिन्छ’’ सद्भावना पार्टीका सहअध्यक्ष कर्णले भने ।

प्रतिकृया दिनुहोस