नेपाल भ्रमणमा रहेका भारतका सडक तथा यातायात मन्त्री नितिन गडकरीले भौतिक पूर्वाधार तथा यातायात मन्त्री विमलेन्द्र निधिसँगको भेटमा नेपालमा जलमार्ग प्रयोगकाबारेमा प्रस्ताव राखेका छन् ।

“भारतकोे जलमार्ग प्रयोगको अनुभव नेपाललाई बाँड्न र आवश्यक सहयोग गर्नसमेत भारत तयार रहेको गडकरीले भन्नुभएको छ,” भेटपछि मन्त्री निधिले भने ।

दुइ देशबीच मोटर तथा रेलमार्गको तुलनामा जलमार्गबाट झण्डै आधा खर्च कम लाग्ने गरेको अनुभव भारतीय पक्षले भेटमा सुनाएको थियो ।

नेपालभित्रै तथा नेपाल र भारतबीच पनि जलमार्गको प्रयोग गर्न सकिनेबारेको प्रस्तावप्रति आफू उत्साहित भएको मन्त्री निधिले बताए ।

भेटमा नेपालको तराई क्षेत्रमा भारत सरकारको सहयोगमा सञ्चालित हुलाकी सडकको प्रथम र दोस्रो चरणको विस्तारमा भइरहेको ढिलाइबारे आफूले ध्यानाकर्षण गराएको मन्त्री निधिले जानकारी गराएका थिए ।

जवाफमा भारतीय मन्त्री गडकरीले आफू भारत फर्किएलगत्तै सो सडक विस्तार कार्य अगाडि बढाउन पहल गर्ने बताएको पनि उनले जानकारी दिए ।

गडकरीले आफूसँगै रहेका भारतका सडक विभाग निर्देशकलाई समेत सो सडक निर्माणबारे छिटो निर्णय गर्न निर्देशन दिएका थिए ।

भेटमा पूर्व–पश्चिम रेलमार्ग र महाकाली नदीमा पुल निर्माणबारेमा पनि छलफल भएको मन्त्री निधिले जानकारी दिएका छन् ।

प्रतिकृया दिनुहोस