बर्दियाको भुरीगाँउ गुलरीया हुलाकी सडक अन्र्तगत पर्ने बगनाहा–१ ढुङ्ग्रहवाको गुप्तेश्वर महिला सामुदायिक वन भित्रको खोला किनारमा बुढो भाले पाटेबाघ मृत फेला परेको छ ।

सामुदायिक वनका चौकीदार लौघरीया थारु विहान वनमा गएका बेला खोला किनारबाट सिनोको गन्ध आएपछी खोजी गर्दै जाँदा मृत बाघ फेला परेको हो ।

ईलाका वन कार्यालयका सहायक वन अधिकृत लल्लन राउतका अनुसार पोष्टमार्टम गर्दा बाघको शरीरमा कुनै प्रकारको वाहीरी चोटपटक नलागेको र चारदिन अघि मरेको हुन सक्ने अनुमान गरिएको छ ।

भारतका वन्यजन्तु र बर्दिया निकुञ्जका वन्यजन्तु ओहोर दोहोर गर्ने एकमात्र मार्ग खाता जैविक मार्ग नजिकमा पर्ने गुप्तेश्वर महिला सामुदायिक वनमा पसेको बुढो बाघले आहारा नपाएर मरेको हुन सक्ने संरक्षणकर्मीले अनुमान गरेका छन् ।

यस अघि साउनमा पनि बर्दिया राष्ट्रिय निकुञ्जको मध्यवर्ती क्षेत्रमा पर्ने शिवपुर ६ को शिवपुर फाँटामा पर्ने कालीगौडी बाँध नजिक वयस्क भाले पाटेबाघ मृत फेला परेको थियो ।

यसअघि चितवन निकुञ्जमा आतंक मच्चाएपछि रेडियोकलर जडान गरी बर्दिया निकुञ्जमा छाडिएको बाघ पनि गत माघ महिना देखि सम्पर्कमा छैन ।

त्यस्तै दुई वर्षअघि चितवनबाटै ल्याईएको रेडियो कलर जडीत नमोबुद्ध नामक पाटेबाघ केही महिना भित्रै निकुञ्जको उत्तरी क्षेत्रमा चोरी शिकारीका कारण मारीएको थियो ।

बर्दिया राष्ट्रिय निकुञ्जमा हालै गरीएको बाघ गणनामा ५० वटा वयस्क पाटे बाघ रहेको तथ्याङ छ ।
भावुक योगी, बर्दिया

प्रतिकृया दिनुहोस