अरब सागरबाट पाकिस्तान, जम्बु काश्मिर हुँदै नेपालको पश्चिमी भेगबाट प्रवेश गरेको वायुका कारण मौसम बदली भई विभिन्न स्थानमा पानी परेको मौसमविद् राजाराम ढकालले जानकारी दिए ।

पश्चिमी वायु पूर्वसम्म विस्तार हुने क्रममा रहेको र बेलुकासम्म देशैभर प्रभाव पार्नुको साथै काठमाडौँमा बेलुकादेखि पानी पर्ने सम्भावना रहेको उनले बताए ।

मौसमविद् ढकालका अनुसार पश्चिमी वायुको प्रभाव १ पुससम्म जारी रहने छ । आज पश्चिम नेपालका वीरेन्द्रनगर, धनगढी र नेपालगन्जमा हल्का वर्षा भएको छ । पूर्वी भेगमा २८ मंसीर बेलुकादेखि पानी पर्नेछ ।

मौसममा बदली भई पानीसमेत पर्ने हुनाले केही दिन तापक्रम घट्ने र काठमाडौँसहित देशभर चिसो बढ्ने मौसम पूर्वानुमान महाशाखाले जनाएको छ ।

महाशाखाका अनुसार २७ मंसीरमा उपत्यकाको तापक्रम न्यूनतम ४ दशमलव ५ तथा अधिकतम १५ डिग्री सेल्सियस रहेको छ ।

प्रतिकृया दिनुहोस