तस्वीर सौजन्यः रिपोर्टर्स क्लब

नेपाली कांग्रेसका नेता प्रकाशशरण महतले सत्ता समिकरणको विषयमा दलहरुबीच सहमति हुन नसकेको बताएका छन् । रिपोर्टर्स क्लबले १० पुसमा गरेको कार्यक्रममा उनले संविधान जारी भएपछि सत्ता समिकरणको विषय सहमति हुन नसकेको बताएका हुन् ।

उनले भने, “दलहरुबीच सबै कुरा मिलेको छ, तर संविधान जारी गरेपछि कसको कुन हैसियत हुने, राष्ट्रपति, उपराष्ट्रपति र प्रधानमन्त्री को बन्ने भन्ने विषयमा विवाद छ ।”

संविधानको अन्तर्वस्तुमा विवाद रहेको भनेर जनतालाई गुमराहमा पार्न खोजिएको भन्दै उनले अब जनतालाई खास कुरा बताउन नेताहरुलाई आग्रह गरे । उनले ८ माघमा संविधान जारी हुन नसक्ने बताए ।

“माघ ८ गते कुनै पनि हालतमा संविधान आउन सक्दैन, मस्यौदा मात्रै ल्याउन सके पनि ठूलो विजय हुनेछ,” उनले भने । उनले एमाओवादी नेतृत्वको मोर्चाले गरेको आन्दोलनको घोषणा पनि सत्ता भागबण्डाकै लागि भएको टिप्पणी गरे ।

८ माघमा संविधान जारी हुँदैनः रावल

नेकपा एमालेका उपाध्यक्ष भीम रावलले यथास्थितिमा ८ माघमा संविधान जारी हुन नसक्ने दावी गरेका छन् । कार्यक्रममा उनले अब ८ माघमा संविधान जारी हुन असम्भव हुने बताए ।

उनले सहमति नभएको अवस्थामा प्रक्रियाबाट संविधान जारी गर्नु चुनौतिपूर्ण रहेको बताए । “प्रक्रियाबाट संविधान जारी गर्नु चुनौतिपूर्ण छ, तर त्यसको विकल्प छैन,” उनले भने ।

प्रतिकृया दिनुहोस