करिब दुई साता अघि सप्तरीको बैरवा नजिक कोशी नदी किनारमा मृत फेला परेका तीन बालबालिकाकी आमा भेट्टिएकी छिन् ।

सजनी सदा अस्पतालमा । तस्वीर: श्रवणकुमार देव

२ माघमा बेहोस अवस्थामा फेला परेकी मृत बालबालिकाकी आमाको अहिले प्रहरी निगरानीमा उपचार भइरहेको छ ।

जिल्ला प्रहरी कार्यालय सप्तरीका अनुसार मृतक बालबालिकाकी आमा २४ बर्षीया सजनीदेवी सदा बैरवा गाविस ८ स्थित डुबान क्षेत्रबाट फेला परेकी हुन् ।

इलाका प्रहरी कार्यालय कंचनपुरको टोलीले फेला पारेको तेरहौता–३ बस्ने अशोक सदाकी पत्नी सजनी बेहोस र नाजुक स्वास्थ्य अवस्थामा भेटिएपछि उनलाई उपचारका लागि कंचनरुप नगरपालिकास्थित धर्मेश्वर अस्पताल ठेलियामा भर्ना गरिएको छ ।

डिएसपी केदार ढकालले प्रहरी निगरानीमा उनको उपचार भइरहेको जानकारी दिए । सजनी अझै बोल्ने हालतमा नरहे पनि उनको स्वास्थ्य अवस्थामा निकै ढिलो गरी सुधार हुँदै गएको अस्पतालका चिकित्सक दिलिप कर्णले जानकारी दिए ।

१९ पुसमा बैरवा गाविसस्थित सप्तकोशी नदीको पश्चिम तटबन्धको छेउमा रहेको दोभान पोखरीमा ६ बर्षीय बालक सन्तोष सदा, तीन बर्षीया बालिका सन्तोषी र ६ महिनाकी बालिका मृत अवस्थामा फेला परेका थिए ।

त्यसअघि एक साता देखि वेपत्ता उनीहरु घाँटी पछाडिको हड्डी भाँचिएको अवस्थामा मृत फेला परेका थिए ।
घट्नाको बिषयमा अन्य अनुसन्धान भइरहेको डिएसपी ढकालले जानकारी दिएका छन् ।
-श्रवणकुमार देव, राजविराज

प्रतिकृया दिनुहोस