सप्तरी सदरमुकाम राजविराजमा नेकपा–एमाले र एमाओवादी नेतृत्वको मोर्चाका कार्यकर्ताहरुबीच झडप भएको छ ।

ढुँगा लागेर घाइते एमाले जिल्ला सदस्य शुभकलाल रामलाई उद्धार गर्दै कार्यकर्ताहरु । तस्वीर: श्रवणकुमार देव

७ माघ दिउँसो राजविराजमा भएको झडपमा ढुँगा लागेर एमाले जिल्ला सदस्य शुभकलाल रामको टाउको फुटेको छ ।

एमालेको राजविराज पार्टी कार्यालयमा ६ माघमा भएको आगजनीको बिरोधमा निस्केको एमालेको र्‍याली र स्थानीय जनआन्दोलन चोकमा सभा गरिरहेका ३० दलीय मोर्चाका नेता-कार्यकर्ताबीच झडप भएको हो ।

एमालेले निकालेको र्‍याली सिरहा रोड हुँदै जनआन्दोलन चोकमै जान खोज्दा संभावित झडप हुन नदिन प्रहरीले जिल्ला विकासको गल्लीबाट पठाएको थियो । र्‍याली जिविसको गल्लीतर्फ लाग्दै गर्दा एमाओवादी मोर्चाका केही कार्यकर्ताहरु दौड्दै र्‍यालीमाथि जाइलागेपछि दुबै पक्षबीच झडप भएको हो ।

ठूलो संख्यामा खटिएका सुरक्षकर्मीले हस्तक्षेप गर्दागर्दै पनि ढुँगा लागेर एमाले जिल्ला सदस्य शुभकलाल रामको टाउको फुटेको छ । उनको राजविराजस्थित गजेन्द्रनारायण सिंह सगरमाथा अंचल अस्पतालमा उपचार भइरहेको छ ।

६ माघमा राजविराजको मदननगरस्थित एमाले जिल्ला पार्टी कार्यालयमा भएको आगजनीबाट कार्यालयभित्रका सम्पूर्ण कागजात र फर्निचर नष्ट भएका छन् ।
एमाले जिल्ला अध्यक्ष गोबिन्द न्यौपानेले आफूहरुले निकालेको शान्ति र्‍यालीमा मोर्चाका कार्यकर्ताबाट आक्रमण हुनु निन्दनीय भएको बताएका छन् ।
दुई पक्षबीचको झड्पछि राजविराजको चारैतिर व्यापक मात्रामा सुरक्षाकर्मी परिचालन गरिएको छ ।
श्रवणकुमार देव, राजविराज

प्रतिकृया दिनुहोस