एमाओवादी मोर्चा सहभागी नभएपनि प्रश्नावली समितिले संविधानसभाले दिएको समयमै प्रश्नावली वुझाउनेगरी काम अघि बढाइरहेको छ ।

समितिमा सहभागी दलहरुबीच विवादित विषयमा सहमति जुट्न नसकेपनि प्रश्नावली तयार पार्ने काम भने अघि बढाइएको कांग्रेसका मुख्य सचेतक चीनकाजी श्रेष्ठले बताए ।

उनका अनुसार संविधानसभाले दिएको १० दिनभित्रै प्रश्नावली संविधानसभामा वुझाउने तयारी भइरहेको छ । समितिले आफैं कार्यविधि तय गरेर काम अघि बढाइरहेको छ ।

समितिलाई २१ माघभित्र सहमति नजुटे प्रश्नावली पेश गर्न संविधानसभाले निर्देशन दिएको छ । समितिले दलगत धारणा र संविधानसभामा व्यक्त विचारमा आधारित भएर विवादित विषयमा प्रश्नावली बनाउदैछ ।

एमाओवादी मोर्चाले नाम नदिएपछि ७३ सदस्यीय प्रश्नावली समितिमा ४९ जनाले निर्णय गर्दै आएको छ । प्रश्नावली तयार पार्ने क्रममा राष्ट्रिय जनमोर्चाले संघीयतामा असहमति जनाएको छ भने राप्रपा नेपालले धर्म निरपेक्षता, संघीयतालगायत अन्तरिम संविधानले स्थापित गरेको अजेण्डामै असहमति जनाएको छ ।

राप्रपा नेपालले आफ्नो असहमतिलाई प्रश्नावली समितिमा नलगिए प्रक्रियाबाट बाहिरिने चेतावनी दिएपनि जनमोर्चाले प्रक्रियामा सहभागी भएर असहमति जनाउने भएको छ । जनमोर्चाका अध्यक्ष चित्रबहादुर केसीले भने, ‘‘संविधानका अन्तरवस्तु भन्दा पनि देश ठूलो भएकाले संविधान बनाउन हामी अवरोध गर्दैनौं, प्रक्रियामा सहभागी हुन्छौं ।’’

एमाओवादी मोर्चा समितिमा सहभागी नभएपनि उसले राखेको अजेण्डा र व्यक्त गरेको विचारलाई भने समितिले प्रश्नावलीमा समेट्दैछ । श्रेष्ठका अनुसार मोर्चामा आवद्ध दलहरु सहभागी नभएपनि उसले राखेका अजेण्डाहरु समेटेर प्रश्नावली बनाइनेछ ।

प्रश्नावली समितिमा एमाओवादी मोर्चा सहभागी नभएपनि सहमतिका लागि पर्याप्त प्रक्रिया बाँकी रहेकाले प्रश्नावली समितिले काम नरोक्ने श्रेष्ठले बताए ।
उनले भने, ‘‘अझै सहमतिका लाग तीन दिनको समय छ । त्यहाँ नभए मस्यौदामा, जनताको राय लिने क्रममा, राय लिएपछि, विधेयक दर्ता भएसम्म सहमति गर्न सकिने ठाउँ भएकाले मोर्चासँग वार्तासँगै प्रक्रियामा पनि अघि बद्छ ।’’

प्रतिकृया दिनुहोस