कर्णाली नदीमा पानीको बहाव दिउँसोदेखि बढ्न थालेको छ ।
जिल्ला प्रशासन कार्यालय हुम्लाका सहायक प्रमुख जिल्ला अधिकारी कृष्ण वहादुर कुँवरका अनुसार १९ फागुन दिउँसोदेखि कर्णालीमा पानीको बहाव बढ्न थालेको हो ।

“हिजो राती बाक्लो हिमपातका कारण नदी थुनिएको रहेछ, अहिले पानीको बहाव बढेको खबर आएको छ,” उनले टेलिफोनमा भने ।
हुम्ला सदरमुकाम सिमीकोटदेखि एक दिन टाढाको दुरीमा रहेको धारापरी प्रहरी चौकीका सुरक्षाकर्मीले कर्णालीमा पानीको बहाव बढिरहेको खबर दिएको हो ।

पानी थुनिएको ठाउँ धारापरी चौकीदेखि डेढ दिनको पैदल दुरीमा पर्छ ।
सहायक प्रजिअ कुँवरले भने, “हिउँले नदी थुनिएको हो, विस्तारै हिउँ पग्लिन थालेपछि बहाव बढेको छ ।”
लगातारको वर्षा र बाक्लो हिमपातका कारण गएरातिदेखि कर्णाली नदी थुनिएको हो ।

नदी थुनिएपछि कर्णालीमा पानीको बहाव घटेको थियो । नदीमा पानीको बहाव घटेका कारण नदी किनारामा बसोबास गर्ने जनता त्रसित बनेका छन् । सदरमुकाममा विद्युत् आपूर्ति पनि अबरुद्ध छ ।

रासस

प्रतिकृया दिनुहोस