तस्वीरः रासस

नेकपा एमालेका बरिष्ठ नेता माधवकुमार नेपालले आगामी १५ जेठभित्र संविधान जारी गर्ने समयसीमासहित वार्ताको सिलसिला विभिन्न ढङ्गले अघि बढाउनुपर्ने बताएका छन् ।

प्रेस चौतारी नेपाल, रासस शाखाको चौथो स्थापना दिवसका अवसरमा आयोजित कार्यक्रममा उनले भने, “संविधानसभाको गरिमा र औचित्यलाई बचाउन चाँडो संविधान ल्याउनाको विकल्प छैन, समय तालिकासहित १५ जेठभित्र संविधान ल्याउने गरी वार्ता अघि बढाइनुपर्छ, त्यसका लागि न्यूनतम सहमति खोजाैं ।”

पूर्वप्रधानमन्त्री नेपालले विभिन्न सङ्घर्ष र बलिदानबाट प्राप्त साझा उपलब्धिलाई संस्थागत गर्न समयमै सचेत हुन जरुरी भएको उल्लेख गर्दै लोकतन्त्रका मूल्य र मान्यतामा प्रश्नचिह्नरहित प्रतिबद्धता देखाउन एमाओवादीलाई आग्रह गरे ।

“अहिलेको उपलब्धि सबैको प्रयासबाट भएको हो, नेपाल राष्ट्रलाई केन्द्रमा राखेर जानुपर्छ, पेल्ने र दबाउने कुरा कसैले गर्नुहुँदैन, दुवै किसिमको अतिवाद त्यागेर औचित्यलाई आधार मानेर अघि बढौँ” उनले भने ।

सङ्ग्रौला र भण्डारी सम्मानित

प्रेस चौतारी रासस शाखाले यस वर्षको ‘प्रेस चौतारी रासस शाखा सम्मान–२०७१’ राससका वरिष्ठ कार्यकारी सम्पादक सरला सङ्ग्रौलालाई र ‘प्रेस चौतारी रासस शाखा पुरस्कार–२०७१ रासस काकँडभिट्टा (झापा)का प्रतिनिधि चन्द्रकला भण्डारीलाई प्रदान गरेको छ ।

प्रतिकृया दिनुहोस