पृथ्वीराजमार्गअन्तर्गत जोगीमारा गाविस–९ स्थित खटौतीखोला नजिकै १६ चैत बिहान दुई सवारी साधन एकापसमा ठोकिएर भएको दुर्घटनामा मृत्यु हुनेको सङ्ख्या पाँच पुगेको छ ।

प्रहरी नायब उपरीक्षक प्रकाश मल्लका अनुसार मृत्यु हुनेमा कोरियाली च्याङबोखी, नो योन डेयुक, जा योङ चो र ली सोङ योङ तथा माइक्रोबसका चालक काठमाडौँ गोलढुङ्गा – ९ बस्ने २३ वर्षीय रोशन भुसाल छन् ।

चार जनाको घटनास्थलमा र योङको उपचारका क्रममा मेघा अस्पतालमा मृत्यु भएको हो । घाइते भएका एक विदेशी र ६ जनाको काठमाडौँमा र बाँकी १० जनाको गजुरी अस्पतालमा उपचार भइरहेको छ ।

काठमाडौँबाट कपिलवस्तुतर्फ जाँदै गरेको लु १ ख ९५९३ नंको यात्रुवाहक बस र पोखराबाट काठमाडौँतर्फ आउँदै गरेको बा १ प १०२८ नंको पर्यटकीय माइक्रोबस ठोकिँदा दुर्घटना भएको थियो ।

घुम्ती सडकमा माइक्रोबसले उछिन्न लाग्दा दुर्घटना भएको मल्लको भनाइ छ ।

सामान्यतया पर्यटक गाडी कम दुर्घटना हुने गरेकामा चालकको चरम लापर्बाहीले सो दुर्घटना भएको प्रहरीले जनाएको छ ।

घटनापछि स्थानीयवासी, राजमार्ग स्वयंसेवक, प्रहरी र सशस्त्र प्रहरीले उद्धार गरेका थिए ।

प्रतिकृया दिनुहोस